洪禮賢講馬：一言為定 谷閘搶眼

魑魅魍魉

　　第九場三班1400米草地。「傾力之城」年幾以來都喺三班打滾，跨季7場只得1場冇前四名（1000至1400米），當中試過重磅、外檔、不同賽道及轉倉，成績一樣冇被影響到，唔係隻馬有幾多分喺手，同埋好heart，呢份賽績邊可以喼得到。

　　上場再跑1400米，沿途唔只冇形勢幫忙，仲要一直喺三四叠望空，冤枉路走得多，但末段可輕易與3W馬「好得意」埋Q， 就連一向拉士幾爆得嘅「紅日」、「高一線」亦追佢唔到，呢場第二名唔簡單；睇佢昨朝最後試跑，比較番上賽前觀感，擒日嗰課試起上嚟仲靚，氣勢、力度和火氣再進一步，睇嚟係愈跑愈弗。負重磅上陣唔會有阻力，只要今場陣上走位好過上場，贏得！

　　第十場二班1600米草地。「一言為定」跑完上場唞咗半個月至操番，呢次賽前又輕咗廿磅有多，唔係冇負面因素。之但係，見佢之前谷閘，出彎後一「的」，隻馬自動自覺喺外檔湧上嚟過晒（嗰朝締速最快），冚過對手姿態好瀟灑，外觀唔覺有問題，加埋，昨朝單試唔係冇神冇氣，隔過一排冇話拖低咗狀態；佢冇報月尾經典一哩賽，剩係報打吡，現階段一條心爭分，今場縮番1600米更安心，向來演出超準嘅馬，尾場穩膽。