楝悉先機：天賜福星泥地出招

猪拉多纳

　　柏寶復出，韋達氣勢盛，會唔會兩大巨頭爭到頭崩額裂，我覺得未必。因為有力從中作梗嘅至少有白德民，睇佢今日騎9駒，有資格入三甲嘅馬真係唔少，一個唔該，好啲運氣幫一幫，隨時3場唔係意外，所以，呢期可能係佢威威之日，冇理由成日大軍壓境都冇料到啩！

　　第二場四班1200米泥地。「天賜福星」明明之前報谷草，攞到保護權竟會用在田泥，咩葫蘆賣咩藥？轉場地係要博博吓，但阿棟索到，呢匹馬泥地唔會考起，性能唔使懷疑。至於，上場梗頸四，臨場拉扶換人，放唔到冇說話好講。不過，未交代馬用番主帥，又不惜變招，如果唔係急切想交差，使咩咁樣部署，8 檔若早段唔係好蝕，擺到喺前面放，泥地唔易追到佢。

醒目精英超級

　　第六場四班1400米草地。「醒目精英」上場之敗，大家有眼見，根本係十年難得一遇意外，真係冇得鬧。假如根據之前賽績，四班點會唔超級，輸過畀「領航人」及「好得意」，呢對馬季內加埋贏了5W！今場只要冇乜意外，篤定贏馬交代。

　　第九場三班1400米草地。「傾力之城」身處三班超得好緊要，重磅唔會驚，唯一敵人係自己，只要足部健康冇唔妥，我認為有潛力上頂班。今季跑了兩場，至此還有正常準備及出得賽，唔應該有憂慮，如8檔唔似上場走得咁蝕，應可補中。


點買法

　　冇得講嘞，今日一於撐硬白德民，除咗會買佢騎師王之外，前述3駒，整條3 x 4獨贏走唔甩，而為穩陣起見，補多條位置3 x 1。心水連贏場合，會揀第二場，睇嚟睇去，得幾隻馬跑，「天賜福星」做膽，腳拖2、5。12，買三重彩可以加埋4、:11。

陳華棟

資深評馬人