借題發揮：刑滿極速重見天日 蓮華生輝撐柏寶

猪拉多纳

　　柏寶，好耐冇見啦！成年咁耐，對上1次出賽已經數到國際賽日，因為之前騎師錦標賽手多多，陣上推撞對手，1次過停夠8日，罰則重手與否，講嚟都無謂，不如放眼未來，且看仲追唔追得切韋達好過！

　　現時韋達41場頭馬，柏寶22場，二人相差19場win，有成半年時間鬥落去，唔係冇可能反先，正如上季尾，佢哋曾經夠有十幾場頭馬差距，最尾又畀韋達迎頭趕上。

　　其實，要當上騎師冠軍，唔係一味夠搏就有用，如果地盤唔夠、手風唔順、心理質素控制唔好等等，一旦持久力唔夠，隨時跌番落嚟。所以，不得不佩服韋達，連年做冠軍，10屆嘅成功背後，是但少一瓣板斧，相信早已落咗二三線，執埋包袱嘅例子，我們亦唔係未見過。

　　講番柏寶，話晒「久休」復出，少少哋都有8駒上陣，有隻馬王「蓮華生輝」撐住，點都會有聲勢。能唔能夠出番嚟即刻捧盃，好難講，事關根據上次賽後柏寶吐出的一句：「牠可能已不能像以往一樣憑拼勁堅持到底」。係咪代表退化？功力已漸漸流失？真係五十五十，但對番一群本地對手，應該高多少。

　　另外，「極速之星」剛戰直路取位有點老襯，如果當時肯博，貼欄推進或有三甲，不過，比賽時千鈞一髮，走位對與錯冇得插，今場用到柏寶，繼續排1檔，追埋今場。而「天之驕子」自從季初熱倒後，柏寶未騎過，突然重跨馬背，有景轟。　

Jack