洪禮賢講馬：周日「柏白」擔當主角

魑魅魍魉

　　系列賽事浪接浪，上周跑完速度系列首關，呢個禮拜日到4歲仔揭幕戰經典一哩賽，同齡精英齊齊撐場，除咗幾匹高分馬之外，剩係一對「軍事」，亦都諗到頭都爆，同埋，單睇1600米賽績，呢場其實有好多馬喺香港未跑過此程，外地有實戰經驗又如何？喺呢度初跑就係初跑，邊隻即刻適應到？邊匹會被考起？幾難一口咬定，所以，係咪高分馬就掂，未必囉。

　　當然，長久以來，平磅賽就係平磅賽，高分馬點都秤先，卡士大過天，路程性能有時係其次，如果唔係，邊可能對上幾屆，1號馬係前列常客，冇理由隻隻1號馬都係1600米好手？！譬如「締造美麗」，上屆賽前未跑過此程，最長跑到1400米，最終一樣贏到甩晒。

　　今屆最高分係「天久」，佢嘅情況近似「締造美麗」，連埋外地賽績，之前十幾場，最盡跑到1400米，跑多200米得唔得？ we neverknow？！但睇佢贏1400米嗰場實在太「恐怖」，造出今季最快締速（季內超過60場），兼技術性擊倒「步步穩」，如果今場唔係去到尾段完全莫氣，邊有馬夠佢鬥！

甜將守尾關

　　講開「天久」，周日柏寶嗰批坐騎係勁，而白德民亦唔覺脆，由尾數番上嚟，「甜將」、「包裝選擇」、「軍事攻略」等等，唔係冇可能包辦三寶。事實上，佢除咗元旦日遇上「男人最痛」之外，往後兩次沙田賽期手風幾順，真係「孖」聲四聲，照咁睇，呢期日賽柏白二人會係主角。

馬會賽馬節目主持　洪禮賢