高清睇跑馬：濰坊鐵馬再搏

魑魅魍魉

　　「濰坊」足足用了一季半時間減分，上季尾重返五班部署回復積極， 一再跑近表現唔差， 今季三十六分起步，評分再減搏殺更明刀明槍，班分有利狀態亦好，可惜無幸運之神眷顧，頭兩仗跑田草1600對住強手，不敵於之後殺上四班繼續有好表現的「浪漫添馬」及「私家路」，至於之後兩場轉戰谷中1650米，分別排在十檔及十一起步，雖因形勢不利次次走三叠，仲要負重磅，前仗甚至全程冇遮檔，一樣拼入Q腳，表現了不起。

　　上仗再爭谷中一哩，即總場次315，排五檔又用韋達，諗住時來運到可補中，冷不提防步速慢得交關，後追馬在內檔被困，到末段望空為時已晚。連番熱倒的確令人失望，但戰意更加可靠，難得連拼無疲態，周日列陣頭場，仍配韋達跑田草1600米，必求補中。

智多飛放心捧

　　「智多飛」今季加眼罩後進步神速，初出已殺入冷位，要留意該彼役不過初跑田草1600米，且對手全是跑開此程之輩，好似「名人」、「健康藍莓」等強手，就算接戰以多馬位大敗，只是扭計唔肯出閘非關實力，拼後密密特訓唔再扭計，相隔兩周再出立即由蟲變龍，仲要第一次跑田草1800即勝，贏接戰補中的「萬子千紅」五個多身位，遭重手加分後，上仗回師田草1600米，即總場次207，能再建一功意料中事，估不到繼續以超班姿態取勝，而且贏開1800 米，縮程1600米一樣得手，難度甚高，升上三班未有阻力，今次第九場蔡廐兩駒韋達統統不騎，一心為「智多飛」執韁，人強馬壯，可以放心追捧。

Sam