楝悉先機：競駿寶寶分量十足

港陌

　　睇完昨日兩單研訊結果，當堂打個突！乜小組咁重手，1個停9日，另1位11日，阿棟唔慣落井下石，呢兩宗事件唔想多作評論，只想講，希望呢類事件唔好成日發生，作為投X人，真金白銀落注，如果買中個唔賣力嘅騎師，有時真係佛都有火。

　　第四場四班1200米。「競駿寶寶」係韋達唔騎，定係佢覺得「芙蓉威龍」好啲，我唔多清楚，唯一知道，佢冇兩個屁股，豈能分身，點都要取捨。旁人的你與我，又點揀好？我就會信前駒，咪睇上場贏得險，第一次跑快活谷咋，應付到急彎算及格。只要跑完上場有少許進步，在今場65分上限場合，依然有十足競爭力。

威海歡騰重返正軌

　　第五場三班1200米。「威海歡騰」今季3場不入三甲，目前63分，會唔會「向下望」，阿棟唔敢批死，但上場縮回此程，算係跑出今季最好成績一場，話唔定，係狀態重返正軌兆頭。點睇呢場都冇上仗咁強，就算只係交出剛賽水準，已有權入圍。

　　第八場二班1650米。「闊袍大袖」今季長跑長有，4場冇W有Q，準到你唔信。今場要升到二班角逐，級數夠唔夠，未跑過，都幾難搵到答案，由於本身已具有相當星味，如果唔係有番多少把握，大可等番85分上限三班賽，風險或會冇咁大，但阿航行得呢步，即係唔怕匹馬升班跑，一於捧佢場，實有鬥志。

點買法

　　尾場感覺穩穩陣陣，「闊袍大袖」準得可愛，同場亦有「鵬力洋洋」，一對咁好賽績之馬，抵用嚟做雙膽買T，腳拖２、３、４、５，而重心連贏同樣揀呢場。而W過關，尾場實要攬住，兩倍就兩倍，冇辦法，至於射邊隻，「競駿寶寶」話晒新勝，可信性高啲。

陳華棟 資深評馬人