洪禮賢講馬：闊袍大袖征服二班

港陌

　　韋達今晚坐擁唔少實力馬，唔好唔記得，好多都係排晒中外檔，谷草C+3欄，克服唔到就係克服唔到，所以，佢啲馬要小心揀擇。馬房方面，文廐今期真係可以有啲「期望」， 以佢手馬，連場上名唔難。　　

重心場次　第8場　第二班（95-75分）1650米

　　「闊袍大袖」及「鵬力洋洋」，一對谷草專家中嘅專家，上二班要考驗進度，但讓磅多，其實唔會怕，要驚就係驚步速唔快，不利後追。

　　「智友」落番二班，用埋小何，計條件不比前兩駒失禮。「幸福紅椒」愈來愈近，騎者在處理上再蝕少啲，或夠上名。

　　「步步快」在此程要留得好好，才有機會上名。「易搏贏」冇乜分在手，只係夠勇。「精算攻略」唔易跑，換人未必有相同效果。「快人快語」路程略短，卻有級數，冷腳。

第1場　第五班（40-10分）1650米

　　「天子駕六」早前贏大閘走勢出奇咁勁，但更重要一點係近期唔瘦，兼且操得，當然，此駒連Q都未入過，難言信心，如跑到比上場較佳水準則有權W。「燈胆寶」五班曾攞兩W，落班好惡，係睇鬥志。

　　「朝東之星」及「常山鎮寶」同樣係正路之選。「駕世鞍」上場已揀過，惟加分後加埋劣檔，唔易保持？！「年年開心」亦有同感。「大唐勇將」和「封面」，如跑1800米會較有信心。「兵奇臨」今場係不良於行嘅第2回合，再冇表現則可分手。

第2場　第四班（60-40分）1000米

　　「紅衣叻叻」上場有晒藉口原諒，賽事形勢唔好，賽後又驗出腳痛。如果攞佢前仗僅敗實績作指標，呢場冇乜對手夠佢揮！「御鋒」冇咁重口，跑谷草多了回氣位，可能放到。

　　「夢幻魔術」及「火燎腚」，有質但進度未夠好。「好妙星」剛仗殿軍唔係證明太多。「電訊新星」最近試谷草大閘，末段唔覺有勢。「先知先覺」早段未必得佢放，易被燒乾。

第3場　第四班（60-40分）1650米

　　「馬有成」及「永得勝」，性能完全唔同，但同樣係實力馬，前駒則要早段夠快才啱發揮，後駒剛好相反。

　　「大地王者」係怕一見好即冇！「心路」重戴眼罩，能否刺激到冇寫包單，未必喼到成績。「超力駒」兩仗前用小何在同程得第四名，磅輕證明有功效。「再來旺財」11檔唔多怕，如處二叠，一向冇問題（韋達今季谷草大外檔上名率逾半），當弗馬難捨棄。「正本大師」剛仗初跑此程卻一直「外遊」，但直路中段曾抗衡過一段時間，今場換人如跑法有別，或會爆得出。

第4場　第四班（65-40分）1200米

　　「芙蓉威龍」、「競駿寶寶」、「天賜福星」及「期望」，乃最有根據，或賽績較突出，論穩健性前駒或稍好，但分數已幾近樽頸；「競駿寶寶」、「天賜福星」則係新興勢力，惟要博進度趕唔趕得上。後駒班底最厚，跑低半班幾惡，而近期工夫亦似對準今場。

　　「延續美麗」好速度卻排外檔，一有對手早段頂住，無可避免要「大外遊」！「清新空氣」唔襟搏，近完未必持續見好。

第5場　第三班（80-60分）1200米

　　「連利福星」排好位跑此程，在三班其實幾有把握，尤其用到柏寶更甚（人馬同程跑5次得2W2P）。

　　「金鑽龍華」係得個「準」字。「心歡笑」睇上場輕鬆輸近姿勢，一哩問題不大，但可能只局限在田泥。「勁有盈」主動型，4檔唔難做啱留放，或有 P。「威海歡騰」上場遇到一批班內又惡又銳對手，惟今場整體水準跌watt，唔係冇權近。「帝豪名駒」剛仗直路受影響，落敗與能力無關，但外檔及重磅，總係有條刺。

第6場　第三班（80-60分）1650米

　　「豹顯神駒」前文已指出，今季表現出進步之處，預期加程後可能會比近兩仗更勁，加上，1檔在C+3欄應會賺（騎者季內1檔上名率近5成），獨贏有十多倍，值得試水。

　　「金添好運」連揀兩次，但孱仔隨時體力頂唔住，純粹睇準備又唔似，希望今場步速快，會啱佢追。「海力童」唔係10檔，其實係必揀之馬，能否克服要睇郭能造化。

　　「好旺財」勝在準，但一哩始終不及1800米，爭位居多。「開心歡樂」之前兩場在備戰上冇今次咁完善，連輸兩場回夠氣，隨時返嚟。「分秒傳奇」係擔心腳傷後復出首仗，計級數有賺。「彩虹幻影」愈來愈似樣，但總覺長途會比此程有把握，但有權爭三三四四。

第7場　第三班（80-60分）1650米

　　「生生不息」未必遇到上場咁靚形勢，不過，對手依然唔多叻，加7分唔會有阻力，仍會有三甲。「福到多多」要視乎步速快慢，如有得追，就開正佢嗰瓣。

　　「勇猛神駒」回谷草唔使捱打，但得與否，情況與前駒一樣。

　　「愛睦善」千辛萬苦贏場，加磅及檔差，已不易再有驚喜。

　　「蓋世子牙」回到一哩，唔係再對住「闊袍大袖」，重磅也有卡士。「滙名燈」往績太準，越程難批死。

馬會賽馬節目主持　洪禮賢