洪禮賢講馬：年初三大家勝利

猪拉多纳

　　年三十晚不外乎行花市，或者同家人食團年飯，指定動作冇得走，尤其已婚嘅我，有老婆有個女，邊可能跳得出家園範圍，只能乖乖做個住家男，暫時與朋友斷絕來往。提到指定動作，新年流流，練馬師為攞頭彩，沖喜吓，可能亦係指定動作，我諗，唔理華洋練馬師，始終佢哋大部分米飯班主係華人，重意頭，人有我有，大年初三贏馬，寓意年頭旺到尾，有邊個唔想！

告東尼喜賀歲賽攞威

　　如果根據近年同日賽事頭馬分布，有1位練馬師甚好此道，就係告東尼，對上4年初三賽事，起孖幾乎成為習慣咁滯，07、09及10年皆有兩W落袋，08年雖然得1W，嗰日有兩駒輸唔係好多屈居第二名，所以，要當日搵個最想攞頭彩嘅馬房，東廐係不二之選！

　　當然，數據或攤路總會有盡時，長期唔爆，咁好「路」，邊使有人日日辛勤工作。平心而論，今期佢手馬唔係特別強，大摩差唔多場場有馬出，人多勢眾過佢，阿蔡情況亦近似。大馬房之中，東廐唔見得擺出強陣，但近年有路可尋，信埋今年先再算。

　　意頭馬「大家勝利」， 揀得大年初三出賽，為乜啫？馬名已經講晒出嚟，兔年大家勝利，啱聽到不得了。講番佢上場贏馬水準，造出時間唔錯，比同日另1組頭馬「進取」快0.18秒，原來擺喺前面走，威力遠比後追好。由於排好位，兼且大部分對手唔叻，重磅仍有再W本錢。

馬會賽馬節目主持　洪禮賢