胡森兔年第1Ｗ夢想成真

猪拉多纳

曆新歲最重頭威頭勢，兔年賀歲賽事，外籍騎練不讓華人專美，更加重意頭，紀仁安策騎胡森旗下「夢想家」3.4倍大熱掄元，先為一眾普羅馬迷大開紅盤，到尾場胡森再贏35倍冷門「經典皇牌」，起孖賀歲，全日出四駒獲兩冠兩亞，入Ｑ率高達百分百。
       
夢想家大熱取勝，勇奪兔年第一W。
尾場贏經典皇牌起孖

馬主陳子光對於「夢想家」響兔年打響頭炮，極表興奮，雖然呢匹馬並非胡森入貨，但佢亦盛讚練者工夫相當好，自從今季加戴眼罩後，名次循序漸進，今次更加響新春日子贏馬，問到往後部署，佢就話最好係承接旺勢，開開心心繼續贏落去。