洪禮賢講馬：傳奇快車三甲穩陣

港陌

　　第六場三班1000米。「多益善」係吳廐少數PP，初出即有走勢，廐內近似例子如「金德寶」、「駿蹄飛」，佢哋當日首戰唔係上名，就係攞到獎金，結果喺第1季成績幾好。「多益善」會唔會「有樣學樣」，睇嚟成數好大，如果隻馬唔係落地適應快、進度嚟得好，以及有番咁上下實力，斷唔會初出入到前列，就好似差唔多同期出身、又係PP身分嘅「海豚」，咪就係1場跑得差過1場，依家得個「等」字。

　　講番「多益善」，首戰1200米嘅前速唔簡單，因為出閘冇耐喺佢埋便係「勁有盈」，後駒跑短途早段點會輸蝕，仲要當時騎者係有意識畀住去頂佢，但一樣唔夠快，「多益善」放到入直路，可以喺最後幾十米至慢啲，並唔容易（未計出閘後被撞和頭段放快咗），而睇佢沿路走規純熟，谷草性能應該幾叻；縮落 1000米，速度已經見識過，唔怕有反效果，有望帶到。

　　第七場三班1650米。「傳奇快車」上場冇咗超快步速，追勁明顯不如前仗（中段留到口擘擘），但最終有P，演出算係收貨，反映勝後加分嘅壓力唔係大。但另一方面，望番今場對手嘅跑法，個心同樣涼了半截，冇明顯會走嘅馬，就算勉強數得出，亦只得1隻半隻，早段唔慌快得去邊，仍會擔心佢畀形勢拖累。慶幸係同場對手唔覺比上場強，計能力，如陣上冇犯大錯，唔難入圍。