借題發揮：我愛您馬名夠冧又浪漫 鄭廐註定有運行

猪拉多纳

　　剛過去星期一係情人節，聽日係元宵節，中間夾住夜馬，令周中賽事平添浪漫氣氛，冇咩做，捉埋另一半入場，都係唔錯好去處，不過，好多時情侶入場賭錢，出場總有部分變咗賭氣，所以，奉勸唔多忍得，或者刨馬唔多鍾意畀人煩嘅馬迷，帶唔帶愛人入場，真係要停一停，諗一諗！

　　記得大年初三賽事，應節馬都有啲跑咗出嚟，好似「財運」、「幸運來」、「新希望」等，究竟呢期中西情人節檔期，又有冇咁嘅馬？一打開排位， 鄭俊偉「我愛您」仲邊有得走啫！情人節，唔講我愛你，仲有咩好講， 除非係銀彈攻勢，咁就講乜都係多餘。如果唔係，要靠把嘴，口甜舌滑做武器，男方：「愛人，幫你買咗六場12號」；女：「咩嚟架？」；男方：「我愛您......」，贏唔贏到係後話，嗰刻冧咗先啦。

兄弟班旋風魅力新勝

　　好嘞，講番鄭廐其他馬，今晚佢除咗有隻應晒景嘅馬之外，唔係冇貨，「兄弟班」及「旋風魅力」都係啱啱贏完，打句問句，點會唔信話鄭廐今晚冇運行。雖然呢個馬房冇乜起孖紀錄，今季得1次，但有時一不離二，可能第2次就喺今晚。

Jack