楝悉先機：火燎腚加程寶中

魑魅魍魉

　　今晚快活谷賽事，睇方仔手馬，應該有心大手出擊，最後結果係點，好難去估計，但鬥志一定有，總之，前中後場次，佢都有強兵駐紮，如果要吼，未交代嗰批可能係重點所在，始終就嚟到季尾，未贏過嘅馬，點都會加多幾錢肉緊，決心會硬淨啲。

　　第二場第四班1200米。「火燎腚」已跑3場谷草1000米，獲得1亞1季，3歲仔距離成熟期尚有好長嘅路，目前純粹跑緊質素，所以，演出穩定與否，其實唔係好有保障，就好似前仗，出閘之前心情煩躁，即刻跑到一箸菜咁。但上場又跑得有聲有色，力壓「御鋒」及「好妙星」，該兩駒再出冇W有Q，水準如何可想而知，呢次加程至1200米，又用到方廐愛將柏寶，決心爭出頭。

駕世仔有場地經驗

　　第五場第四班1650米。「駕世仔」早已註定逢出必惹飛，總之，一日未贏，跑咩路程，唔慌好分得去邊，所以，唔使介意成日轉騎師、換路程等問題。上場之敗，唔好賴巫斯義，今次事件性質唔同季初「鎖定目標」嗰次，騎者想留住跑，但係冇馬放頭，焗住自己帶。

　　呢場返谷草，場地有晒經驗，一定更啱發揮，可望補中。

　　第八場第一班1200米。「文武維揚」喺跑馬地百萬挑戰盃積分榜帶緊頭，冇乜好留，相信會叠埋心水去到盡。今仗殺上一班，對手又再增強，心水清嘅馬友，不妨睇睇新加入那批馬，有幾隻叫做季內叻過，估計此駒目前靠埋啖銳氣嚟跑，要征服初上一班嘅阻力，唔係難事。

點買法

　　開場白都講過睇好方嘉柏戰馬，今晚重點自然放喺呢個馬房，「火燎腚」搭「駕世仔」呢條2x3W，我就買梗。至於重心Q，一樣搵呢兩場嚟過關，熱熱哋，希望過晒搵到餐晚飯。

陳華棟　資深評馬人