高清睇跑馬：氣定神閒開勝門

港陌

　　「新領袖」上季贏馬之後冇場好睇，更跑到全無朝氣次次大敗，徐雨石唯有在配備下苦功，果然前仗重戴眼罩上陣即有不同走勢。該役此駒出戰1400米，排十三檔起步，大半程留在尾二、三位置，轉直路彎時已走出外檔，最終後上走入一席接近的第五名，已試準走勢。

新領袖打鐵趁熱

　　上仗總場次341，「新領袖」繼續戴眼罩出爭1400米，結果順利補中，雖然蹄下敗將不算勁，所造的1分23.35秒亦未算出色，但睇番此駒入直路後，大半程被「愛拚者勝」和「精算拍檔」阻了去路，到最後二百米才望空，然而撻着後即後上如箭贏馬，演出屬高水準。今仗此駒再戰四班賽，繼續交由韋達操刀，明顯有心打鐵趁熱，可作重心看待。

　　另外，「氣定神閒」質素其實不俗，卻因為口勁太重，經常跑來搶口兼岳頭，才未能交出水準。不過，此駒於總場次209出爭田草1400米，走來卻斂口有進，首次殺入三甲之餘，更只不敵「甜將」及「勁飛寶」兩匹超級馬，反映戰鬥力十足。

　　上仗總場次371，「氣定神閒」再爭1400米，排一檔起步當然沿途貼欄慳位，但入直路後一直被「龍城動力」阻住，轉出中檔又被「金鑽龍華」所封，直到最後三百米先才望空，最終不敵賺盡形勢的「傾力之城」同「龍城動力」得第四，可算雖敗不辱。既然三班都可接近，今戰此駒降落四班作賽必更有威脅，卓利騎慣騎熟，有望打開勝門。

Sam