楝悉先機：幸運勇士唔簡單

魑魅魍魉

　　呢期啲標準馬迷真係飽晒，昨日有6場澳洲轉播賽，今日又有10場本地賽，賭足兩日，咩嘢癮都夠晒皮。而今日重頭戲香港金盃，阿棟勸大家唔使三心兩意，白德民騎嗰匹九成九係主力，唔好諗錯隔離，以為係「後排扣殺」，出嚟旨在搖旗吶喊。

　　第一場四班1200米。「和牛」上場初出得幾成狀態，身未收得好，當時睇啲飛，唔係啩？！獨贏捧到廿幾蚊，結果唔入三甲，但賽果對我嚟講，其實唔意外。呢類3歲馬，跑完1場可以進步到你唔信。只要臨場見隻馬收到身，比上場精神嘅話，可以WP一捧。

排1檔有助

　　第二場四班1400米。「幸運勇士」跑咗3場，仍然未熟，有時會跑跑吓精神唔集中，有時又會片出片入，不過，唔計前仗被問話嗰場，餘下兩場都幾好走勢，睇嚟隻馬有啲前景，唔係四班貨色咁簡單。如果今場再比上場規矩，比賽途中自己犯錯少啲，其實要上名真係唔難，當然，我哋亦可寄望1檔會令到匹馬跑得順啲，可能贏埋。

　　第七場本地一級賽2000米。講咩都冇用，大摩時真時假，但「魔法幻影」有晒級數，當日咁心雄走去國際賽搏命，就知隻馬2000米能力，喺大摩心目中有幾勁。時至今日，平磅同班本地馬比賽，真係大人同細路仔玩，所以，熱一熱都冇辦法，咪拗頸。

點買法

　　香港金盃咁鍾意「魔法幻影」，W過關實會扣佢，另1隻選「幸運勇士」，乘埋都唔錯。至於重心Q場合，金盃嗰場冇肉食，惟有揀第二場，7膽拖1、8、13，如果買三重彩可考慮埋2、3、11。

陳華棟