香檳歲月谷戰冇難度

魑魅魍魉

鄭俊偉剛戰邀請莫狄遠道而來為「好爸爸」壓陣，可惜無功而還，明晚賽事同主馬「我愛您」因輕磅關係以賴維銘出戰，配合另兩匹近績不弱之實力廐侶「香檳歲月」及「兄弟班」分途出擊，練者精兵部署下當有連場數胡機會。
  






列陣第二場四班一哩之「香檳歲月」，對上四仗跑田草千四及千六，得一勝三位，此番雖然掛頭牌初跑谷草，但鄭俊偉認為此駒早前試谷閘效果不弱，轉場威力不減，他說：「今次『香檳歲月』負重磅初臨谷戰，無疑存在不少難度，惟質新馬始終要多方面嘗試，況且牠最近試谷閘走勢暢順，場地性能應冇問題，以目前的進度及狀態，今仗續於四班參賽，機會仍樂觀。」
  
馬偉昌，鄭俊偉

我愛您輕磅發圍


至於第七場三班一哩的「我愛您」，季初自於同程贏馬後，升班連敗三仗，鄭俊偉認為此駒今戰回師強項，在三班孭輕磅仍可恃，難得今仗所遇對手不太強，頗具爭勝機會。另外，上仗增程二千二百米只得梗頸四的「兄弟班」，鄭俊偉坦言此駒目前性能應以千八米最首本，今仗縮程而臨，可再度展現牠的真正威力，於第四場五班場合逞能。