洪禮賢講馬：勁闖駒中國好鷹之團足球快綫 魔法幻影自由好勁飛寶勝眼光

港陌

　　今日喺沙田C欄上演賽事，睇過之前三兩期賽果，模式近似C+3欄，唔係咁有利後追跑法。而今日兩大騎師韋達及柏寶，胯下惡馬多籮籮，熱門客食粥食飯，好睇佢哋表現。

重心場次:第10場 第二班（100-80分）1000米

　　「加州財子」以快時間完成三連捷，賽績太秀麗，而賽前試大閘，韁繩鬆泡泡一樣贏得易，狀態仍勇，應可保持不敗身。

　　「多多寶馬」和「加州滿意」，上場差唔多同到終點，表現恰如其分，轉到此程一樣啱。「超群名駒」外地有晒直路賽經驗，雖然大閘走勢唔算吸引，初出也未可睇小。「明燈」剛仗發揮好似無人駕駛，咁都追得唔錯，換人兼轉程，略有期望。「酒勝」輕磅卻不夠銳，兼且對手太強。

第1場 第五班（40-10分）1400米

　　「愛拼者贏」1檔，預佢守到好位，實會賺腳程，形勢最有利。「朝東之星」始終季內五班已兩W，卡士有晒，而前仗同程改用後上跑法都有Q，賽績有睇頭。「勁辣椒」上月大閘完全唔討好，好在多操個幾月，進度好番唔少。「強駒」上場有冇血都好，騎法真係睇到眼凸！希望今場騎者會用心跑，隨時變身，只因隻馬既分利又有態。「旅遊王子」前仗同程輸近係貼晒欄跑，呢場10檔，際遇不易會好。

第2場 第五班（40-10分）1400米

　　「大地神駒」又係已手執兩W嘅班內選手，仲要負磅唔係太重，此程又會比短途正宗。「創先機」1000至1400米都係射程，跑開有基本水準，只要唔係臨場癲晒，會有三甲。

　　「分秒必爭」位好，夾晒跑法。「好精伶」唔係之前腳痛，必拖，因早已指出暫時應以此程最好，兼落到五班略超。「齊鼓掌」等番跑1200米才考慮。「歡心」純粹早課有好感，冇任何賽績支持，大冷可考慮。

第3場 第四班（60-40分）1000米

　　「勁闖駒」暫時只得一段力，跑短200米冇壞。「鷹之團」唔係之前冇操一輪，機會應在前駒之上。

　　「足球快綫」首仗睇得唔打得，開氣後希望會唔同晒。「中國好」及「金巴利來」，準備夠完整，狀態又夠好。「金添多彩」經常試大閘喺前列返嚟，但總覺仍略帶急躁。

第4場 第三班（80-60分）1200米

　　一對前景秀麗之馬「旺當家」和「喜惑」拗手瓜，前駒上場半力擊敗強手，後駒插班初出已幾乎贏到，三班點會留得耐。

　　「橫掃千軍」及「寶成智星」，因應今場或冇馬走，角色幾互動，1隻有速度，1隻檔靚，未必係陪跑。「勝利就手」跑姿仍亂，但跑回短途，總比中程啱性能。

第5場 第四班（60-40分）1600米

　　「香檳歲月」和「精奇」，算係今場比較四正一對馬，起碼路程及能力有好根據。

　　「寶德」剛賽入P水準略有疑慮。「奪錶」五升四班，以現今水平唔會驚。「財源來」初上一哩表現普通，或是未適應，如按照前仗走勢，中程會係目前最佳出路，畀多次機會。

第6場 第四班（60-40分）1200米

　　「長勝」2月中工夫曾經斷過，但眼見之後個多月喺準備上再冇問題，四班微超之馬，由好師父騎，或發揮到最佳水準。「勁贏晒」初出末段狂追，姿態引人。

　　「好友星威」近兩仗成績有出入，或是沿路二三叠嘅分別，今仗7檔希望處理得好，而睇近日備戰，唔似冇戰意。「夢幻魔術」近期兩大閘早段冇慢，試得亦順暢有餘，轉場應有驚喜。「大將軍」初出好差，惟復課試跑卻有進步。「明海光輝」前仗力拼「禮尚往來」賽績好，要拖。

第7場 第四班（65-40分）1400米

　　「白鹿勁」降班即輸近，當時唔係喺馬林重重圍困，三甲唔會冇，睇嚟落班後形勢與前時係兩回事。「太陽海岸」初出水準普通，陣上際遇又差，咁都贏到，中線睇佢，至少二班夠贏。

　　「風雲武士」及「芙蓉威龍」，能力有幾多，近績見晒，正路腳。「利駿」有過1場實戰經驗，借埋小梁減磅，或會比上場更有威力。「美的人生」近仗走位唔錯，跑低半班，有權上名。

第8場 第一班（110-85分）1400米

　　「陽明深心」與「傾力之城」，各有優點，跑法亦主動，銳開上班依然夠殺。

　　「永勝多」唔夠班，但對手唔多，負輕磅，或會有P。「續領風騷」大閘試得唔錯（出閘慢啲），全程扣得實而好有競逐興趣，初出已有良好水準。「貝利高」近仗發揮冇大錯，成績卻好差。

第9場 二級賽（3歲及以上）1600米

　　「魔法幻影」與「自由好」係差唔多馬，但如果後駒交到應有水準，喺呢程會略高多少。

　　「勁飛寶」初次跑group，就算好銳，總係好大考驗。「共創未來」放頭跑而敗，上場賽績抹咗去，不過，初跑此程，未必即時適應。「勝眼光」2檔，估計可順跟「萬事佳」，整體形勢佢最理想。

第11場 第三班（80-60分）1600米

　　「新希望」跑得啱，喺三班唔會冇得出頭。「有盈有利」性能幾似前駒，3檔希望賺到腳程。

　　「高友勁」和「逸逸友福」唔叻，只係可揀之馬不多，勉強考慮。

　　「進取」此程係咪唔得，睇埋今場先算，因上場跑法太蝕章。