洪禮賢講馬：滙名燈三甲穩陣

魑魅魍魉

　　第六場三班1200米。昨朝晨操睇見「步步闖」，唔係好覺狀態養眼，好火好到唔貼唔得嗰種（近況平穩啫），亦唔係有咩特別動態，令我聯想到佢呢場實搏。揀嘅原因完全係陣中表現所致，佢喺跑得近唔近嘅賽事都好，同樣有吸引嘅地方。就以兩仗前初跑谷草（同程）嗰場為例，三班賽而頭兩段造出二班時間，返嚟唔斷至怪（雖然外地係放頭贏），仲要當時轉彎性能好唔順，但只係輸3乘幾。

　　近兩仗轉咗後上跑法，成績1場好過1場，陣上卻硬係有阻滯，如果唔係前仗同程已可上名。至於上場入到三甲，未必係泥地性能好，感覺上，評分有利此其一，此外，轉型後進一步把能力值增強。由於目前有兩把刀喺身，留放想點都得，預佢排1檔可能守好位，話唔定比起後追跑法更煞食，有望出頭。

　　第七場三班1200米。如果馬會設有馬匹勤功獎頒獎典禮，「滙名燈」絕對係當之無愧，跨季18場未甩過前四名。隻馬唔理係跑田草、谷草或泥地，1000米定係一哩，以及跑法進唔進取也好，總之場場交出100%忠心度，今場如要搵馬膽，佢係不二之選。

　　由田泥轉回谷草，又遇番一批老戰友，如「連利福星」、「勁有盈」等，所以就算評分區域上調，其實形勢同之前冇咩唔同，唔係話滲入好多勁旅，只要7檔唔係遇上太差處境，應有三甲。