洪禮賢講馬：新領袖金剛驃旅遊小子財富之星 漸信良駒旋風魅力龍城動力四季

港陌

　　谷草A欄賽事，本應比較正路，偏差都唔會咁大，問題係時近季尾， 模式未必如一，還是逐期去計好啲。而睇番今期馬房陣容，摩方兩個大馬房最有睇頭。

重心場次：第6場　第三班（80-60分）1200米

　　「步步闖」之前兩戰谷草此程，用咗兩種完全唔同跑法，一樣咁近，場地性能試好晒。今場有1檔，估計唔使留得咁後（外地曾以自領贏馬），能力會比前仗後追更強，係時候出頭。

　　「威威多星」輸了跑法及檔位形勢畀前駒，但計能力喺今場敢認第二。「清新空氣」加咗磅兼外檔，要再W唔易，充其量拖腳。「歐洲動力」情況近似。

　　「堅旺財」對上兩場全拜沿途外叠所致才輸，至於縮程上陣好與壞，以目前未收斂嘅脾性，可能係好事。「龍得風雲」及「萬事綵」三班唔易搵食，限於三至六名。

第1場　第四班（60-40分）1000米

　　「星光活力」操練有懷疑，惟上場係有起色，希望2檔可順利攞欄咬好位，提高勝算。「盈驥」一再跑得好，狀態處穩定期，用埋柏寶，應會搏埋今場。

　　「美妙時機」早課見佢仲係冇乜色水，就算上場追得好，仍未有信心。「好笑容」對比近仗賽事，此程比1200米更啱。「枕住贏」11檔有危機，希望早段形勢不似上場，才有機會上名。

第2場　第五班（40-10分）1200米

　　「亞洲橙王」正退化，近況則不差，落到五班希望有價講。「揀得準」始終係同場喺季內曾勝馬，有埋1檔，而路程啱，實力馬。

　　「聚有盈」減分早已過籠，級數壓過大部分對手。「團隊福星」操練工序「甩咳」，有戒心。「睡眠科技」加罩試閘速度感幾好，3檔如可搶出，唔係冇機會帶到。「勵盈」此程會比前仗1000米好追，邊線馬。

第3場　第四班（60-40分）1650米

　　「新領袖」肯增程係好事，因前仗賽後已覺有此需要，係擔心今場早段或會比正常慢，佢拉士難追。「金剛驃」好位且路合，預期用到中置跑法，應有能力或可盡情釋放。

　　「旅遊小子」跑至季尾已回復作戰水準。「哈哈大少」唔喺最佳之時，係跑班。「財富之星」仍有狀態，而賽前多了休戰期，可令威力稍增。

第4場　第四班（60-40分）1650米

　　「大地王者」上場輸在對手慳晒位所致，如喼到演出水準，料可補中。「善風」剛與前駒同場，末段追好多，若今場早段一如所料扯快啲，末段佢就好世界。

　　「新三刀王」冇顯著進步，只係狀態保持，憑好位或上到名。「橫亨」12檔不易克服。「神勇馬車」剛仗途中被擠壓，令早段被迫落後，拉士仍追得唔錯，今場再跑同程兼好位，值得考慮。

第5場　第四班（60-40分）1200米

　　「清風駒」上場出閘已見不再慢，而力迫「勁闖駒」賽績亦值得重視。「安瑪」冇好好利用上場2檔天然優勢（出彎大外叠），蝕得多仍可交出強勁衝刺，冇理由換人唔追多場。

　　「華倫天奴」剛賽7檔起步，大半程唔上唔落，跑法氣餒，希望換人後，有番前仗水準。「皇仁勁駒」與「王者先鋒」剛仗同場，前駒贏得掹掹緊，後駒則後上有勢，一對馬在此唔係冇條件。

第7場　第三班（85-60分）1200米

　　「滙名燈」勝在準，評分盡晒，睇吓忠心性格可唔可以搭夠。「步步快」有過1場重新適應，再跑短途會叻啲。

　　「駿蹄飛」鋪排與前駒雷同，但賽前1課都唔跳，點都欠把握。「活力至寶」操練唔妥善仍可在上場入Q，算本事，惜今場10檔，要睇早段際遇。「連利福星」近況平穩但冇分喺手，望有三甲。「高風格」情況與前駒差唔多。

第8場　第三班（80-60分）1650米

　　「漸信良駒」上場可以贏到甩晒係意想不到，加7分未有壓力。「旋風魅力」輸完刻意唞唞，之後工夫重新壓迫，早前贏大閘姿態出色，論態標青。

　　「龍城動力」贏在級數，論場地性能則冇前兩駒咁有根據。「紅跑車」和「永得勝」，前駒有班，後駒夠銳，可拖。

　　「四季」陣上漸漸冇之前咁促，如非完全唔啱谷草，成績有權再進一步。