楝悉先機：般若質高監生吞

魑魅魍魉

　　對於田草C+3欄賽事，阿棟一向保持高度警惕，事關呢條賽道後上馬成日冇得追，有啲似快活谷，買後追馬好似好笨。而我睇今日大摩會大舉出擊，出馬數目雖不及告東尼多，勝在以質取勝！

　　第一場四班1200米。「般若」台型唔係冇，據馬房手足透露，呢匹馬中短線評估，三班實有得贏，喺四班點會「恰」唔到對手。如果睇佢首仗表現，真係有啲失望，跑落唔係好有競爭力，仲見佢有唔少新嫩嘅問題，但有時質新馬跑完1場，可以進步好多，實力忽然大幅增強唔係未見過。既然信佢有啲前景，先跟一注唔覺笨。

　　第六場四班1400米。「文武精神」第二仗已要跑1400米，就知此駒唔係短途馬，就算上場贏到，其實都係掹車邊，大話夾好彩，假以時日，唔上 1600米，好難再有突破。不過，現時仍在里程初期，唔使咁快行呢一步，尤其仲喺四班，未有需要。今仗用柏寶，我認為比起韋達更啱，呢匹馬拉士好受騎，阿寶可能進一步發揮到那股後勁。

金德寶有欄對手難追

　　第七場三級賽1000米。「金德寶」屬馬后級，轉到苗禮德馬房，會唔會改造成功，能力比之前三級跳，呢點唔排除，但阿棟冇諗住喺度比較邊個馬房叻啲。純粹講匹馬直路賽表現，的確好準繩，畀埋個10檔佢，更加好放，貼住欄走，對手未必可以追到佢。

點買法

　　今期重點放晒喺頭場，目標單純，1場定勝負。「般若」隔夜有10倍W，我一定唔放過，WP買佢。至於，頭場買Q策略可分大細注，１搭４呢瓣正Q可買大少少。而４拖２、６、８、１０呢幾條，則買埋PQ。

資深評馬人　陳華棟