借題發揮：度過冷淡期 合作馬激增 葉楚航柏寶又嗒同

魑魅魍魉

　　喺上季尾，葉楚航及柏寶一度冇晒合作，當日倉主撐行晒韋達，時至今季，仍然偏重韋達，有接近一半頭馬由韋冠軍建功，不過，葉柏關係已好番，就算未返到蜜月期，肯定唔喺插喉期。自從11月勝出「連利精英」之後，倉主亦多咗關照，將部分實力馬畀柏寶跑。但嚴格嚟講，二人合作次數並唔多，就以谷草為例，原來只得11次咁大把！

　　1個咁鍾意擺啲馬喺谷草搏殺嘅葉楚航馬房，加1個現為騎師榜二哥嘅柏寶，二人谷草合作次數，差啲兩隻手數得晒，開咗季8個幾月嘞，合作有幾頻密，唔使多講。然而，今期忽然有3匹合作馬，此乃「火箭動力」、「橫亨」及「佳同」，當中有冇搭豬頭骨，真係要佢哋先知，單講數量，就係今季谷草最多合作馬嘅1期，唔會孭鑊連場啩！？

火箭動力降兩班惡

　　睇過3駒近績及秤埋實力，如要3隻剔除1隻的話，「橫亨」係不二之選，搏極未贏不特止，連Q腳都未入過，邊有咁多子彈再跟，未喺五班見，唔使理佢住。反而「火箭動力」情況就唔同，降兩班嚟跑，對手真係「面目全非」，只要佢跑得到最近兩場一二班同程得季殿水準，聲大夾惡啦！至於「佳同」，幾可肯定獨贏係廿蚊貨仔，唔會奢望好分得去邊，但以佢上場贏馬姿態，賠率一博一，其實已算合理。

Jack