高清睇跑馬：綠駿群英後追勝前置

港陌

　　第二場五班1800米。「綠駿群英」告仔肯收梗係有計，轉東廐後首仗跑田草1600米，後備補出備戰未算最好，一樣在強組追近；接戰谷中1800米強勢出擊，點知排十一檔，加上唔想留後，全程被頂出三叠，三甲不入有點失望，但劣檔都跑第四，與最近贏馬的「兄弟班」幾乎同到，表現及格有餘。

　　前仗總場次495，「綠駿群英」改攻田草1800米，十四檔留前鬥後，入到直路一揮而就，終於贏番場，最吸引的是勞愛德首次策騎，未知係龍係蟲，居然到最後三百米才發力，明顯知道牠大把在手。上仗轉戰泥地1800米，場地合適與否見仁見智，但一改留後戰略跟在前跑，沿途望空依然輸得唔遠。已確認後追最好，相信今次回師贏馬路程必重用最佳跑法，戰意無疑。

　　第九場一級賽1600米。「締造美麗」上季四W的確精采，但下半季未再贏馬，以為牠實力見盡，誰知今季大有進步，頭三仗熱身，至十二月香港一哩錦標突然出招殺退外隊馬。可能該役步速偏慢，冇馬同佢搶放，但接戰董事盃1600米再建一功，「包裝大師」放頭步速唔慢，確證非符碌。前仗總場次448，捧走女皇銀禧紀念盃一樣厲害，縮程1400米一樣得手，仲要全程走三叠冇遮檔。之後遠征杜拜免稅店盃，既跑左轉又增程至1800米，落敗毋須介懷。回港立即積極備戰，顯然體力充沛，續配最佳拍檔巫斯義，再次殺退外隊馬唔奇。

Sam