馬主論戰

猪拉多纳

大摩想續領風騷

　　近期大摩畀告東尼狂追，暫時跌咗落練馬師榜第二位，但今日摩廐有唔少惡馬上陣，睇嚟有意急起直追，其中尾場「續領風騷」就好啱心水，上仗初出即刻同廐侶「傾力之城」串Q，實力唔簡單，跑過一場之後應該會再進一步，可食尾胡。另外推介第三場「鷹之團」，連續兩仗做阿二，實際表現一啲都唔曳，今次繼續跑直路賽，再由柏寶操刀，可以坐正。

張敬山

麗晶之星咪睇小

　　近期中下游馬房頻頻出擊，睇嚟唔少倉主都想盡快贏夠數上岸。暫時只得10W嘅吳定強，今日出馬唔多，但第二場「暖在心頭」應有機會再贏，呢隻馬近兩場取得一冠一亞，狀態回勇，睇番上季尾跑四班賽都有得鍊吓，今次繼續響五班跑，話唔定可添食。另外，華廐「麗晶之星」上場響1200米輕鬆放到，今次上四班跑直路賽，用「千王」卓利操刀，咪睇小。

任達華

佳景良駒三連捷

　　剛啱韋達只係憑「馬中神駒」贏一場頭馬已經封王，真係連運都贏埋，今次我睇好佢繼續有馬贏。

　　鍾意第八場「佳景良駒」，近兩場跑田草1800米愈贏愈易，四歲馬真正大熟大勇，今次升班一樣冇有怕，睇腳法跑2000米仲啱，三連捷在望。另外第七場初出馬「正榮」都唔可以睇小，近兩課試閘走勢好靚，初出即刻跑1600米，蔡約翰一定諗過度過，要捧。

寇鴻萍、梁廷鏘