洪禮賢講馬：白鹿勁贏級數 前仗走光 今換人跑

魑魅魍魉

　　巫斯義周一客串，未跑第2匹馬「龍船快」，已經暈得一陣陣，當時睇電視見佢面青口唇白，好似大病一場咁款，雖然之後佢可以頂到尾，好難唔令人聯想到佢氣力出現問題，令到暈完嗰6匹馬冇隻有P。但講句真心話，當日的確曬到阿媽都唔認得，筆者坐喺冷氣房講馬（開住個窗），一樣感覺到出便熱辣辣，騎師們仲要喺馬背上，其實同喺蒸籠冇咩分別。

　　唔知巫斯義係聽小組勸諫，定係搵唔到馬跑，呢期只係客串騎5駒，比周一少兩駒，如果因為履行聘約少咗，承受壓力冇咁大，會唔會成績有唔同？真係好難講，點都要秤吓佢啲馬有冇把炮。而睇佢嗰手馬，除「正歡騰」新勝外，其餘都冇乜近績可言，邊線馬係佔大多數，衰啲講句，就算呢期成績普普通通，都唔會點畀人插。

　　講到巫斯義嗰5匹坐騎之中，對「白鹿勁」仍然未心息，但望過騎練合作往績，真係唔開胃，因上季至今嘅合作馬隻隻「撇」，對上1隻W已經數到08 年11月「戰士」，令到個人對「白鹿勁」都棹忌。但另一方面，隻馬喺近兩仗三班1400米嘅表現唔係曳，前仗末段困喺馬林照撲上嚟，經已走光，而上場出閘慢，拉士依然追番唔少失地。今場跑低半班，換了大堆四班對手，級數點都高啲，跑個P唔覺意外。

馬會賽馬節目主持　洪禮賢