棟悉先機：精奇減磅增戰力

魑魅魍魉

　　睇天文台預報，今日可能有幾陣雨，但唔知幾時會落，如果以正常情況去計，A+3欄好利後上馬，當然，如受天雨影響則作別論。而睇過各場馬嘅隔夜賠率，唔少隔晚熱起上嚟嘅馬，其實都幾可靠。

　　第七場一班1600米。「軍事行動」上場如果唔係白德民喺直路一度搵唔到空位，唔好話有冇得贏，都費事講得咁嚴重！一席三甲有梗，好大機會連Q 位都畀佢搶埋，只可惜，半條直路冇份衝，拉到出差唔多最外線，前列數駒已走甩晒，佢縱有好強拉士，一樣無補於事。雖然今場大摩又唔只出1駒，唔知係咪真身，但「軍事攻略」已交代，呢匹同主馬冇理由近完又要等啩！

何方神聖夠級數

　　第八場一級賽2000米。「何方神聖」上場打吡唔係跑得唔好，名列第五名及格啦，如果唔係出閘慢咗，要逼番隻馬幾步，因而跟得前咗，可能拉士一段會更貫注，雖然話今場係國際一級賽，唔同上場嘅4歲賽，蝕分更加多，但我認為呢匹馬好有級數，應會過110分，究竟有冇睇高咗，跟埋呢場先。

　　第九場三班1600米。「精奇」最近4場賽事有3場跑入前三名，唯一唔上名一役，睇完成個人呆咗，但無謂再講嘞。主要想講番佢贏馬嗰兩場，首捷打低「夢想家」，之後人哋都識贏，上場衝贏嘅「奪錶」，則係近績準之馬，所以兩W都有代表性。呢次上三班少負10磅有多，後勁或會仲犀利，即刻克服到升班壓力都唔奇。

點買法

　　睇落今期有幾場都係大團圓結局居多，真係要小心啲揀，由於預咗熱門射熱門，回報未必高，一定要好好地控制注碼。WQ過關都係揀第七場搭第九場，馬膽當然係「軍事行動」及「精奇」。

陳華棟