洪禮賢講馬：太陽海岸 衝擊三W

猪拉多纳

　　第九場二班1400米。唔會對「蓬萊仙子」嘅前景仲有好大期望，經歷上季4W後，今季仲有馬贏，已覺佢幾本事。但如果隻馬評分唔係漸有壓力，今季冇必要轉到谷草搵着數，因上季跑嗰12場，清一色係1400米，練者在安排賽程上，今季明顯有唔同態度，已經講咗大家知，假如今季繼續用同一手法，真係唔易交代到。

　　睇「蓬萊仙子」嘅往績，拉勻計算，好少會唔喺前列過終點，尤其係1400米，最近喺同程跑得唔好，都係有原因解釋，如賽後驗到不良於行、出閘大漏兼失蹄等等，總之，喺過去16場同程賽事，只得4場冇前五名。剛賽如果唔係中間兩段放快咗，可能拉士唔會畀人任過；撞啱今場唔會有幾多匹對手同佢搶，假使騎者喺控制步速方面做得比上賽略好，一席位置應該有。

　　第十場三班1400米。「太陽海岸」跑兩場贏晒，初出1200米冇走位可言，又遇到頗差形勢，錯晒一樣贏，完全係級數搭夠。上場轉到此程，贏來掹掹緊，係加磅關係，抑或加程問題，其實唔重要。反而，佢喺陣上嘅犯錯地方少咗（直路發力時仍有多少斜跑），先至值得重視。由於後生仔有級數，升班唔會怕，尤其負磅輕番，拉士爆起上嚟會仲勁，可望三連霸。

馬會賽馬節目主持　洪禮賢