賠率有路捉：蔡廐馬「首」戰重飛

魑魅魍魉

　　噚日晏晝，除咗第二場「駿馬飛騰」未上過名而成為大熱外，其他都好正路，睇嚟幾穩陣。另外，筆者又察覺蔡廐兩匹初出馬飛數其實都硬淨，佢哋分別係三場「首飾達寶」及八場「皇帝法令」，前駒個W更一度熱至3.2倍，好似贏梗咁，不妨拖番注。

　　講到怪飛馬，第五場隻「信賴」真係唔講得笑，佢個W曾得11倍，或者你會覺得十幾倍有咩咁值得大驚小怪，但呢隻馬自從轉姚廐後，五仗冇一次唔係冷到震，至少都36倍，對上三戰更是99倍大冷門，可想而知，今次墊底飛堅到不得了。仲有樣嘢不得不說，佢喺胡森馬房嗰時都試過同樣情況，明明之前嗰仗仲有34倍，翌仗竟然得番14倍，結果真係W咗，由此證明，隔夜飛堅係出擊先兆，捧番一W三P至好。

馬偉昌10倍有蠱惑

　　騎師王方面，韋達、蔡明紹、柏寶、何澤堯同馬偉昌五位比較熱，當中馬偉昌飛數最離奇，雖然話佢頭場「熊英雄」佔盡優勢，不過佢全日得五匹馬騎，開售都係得10倍？好似有古惑，博吓冇壞。

周仲