洪禮賢講馬：賽馬持久戰求存法 注碼控制第一戒

猪拉多纳

　　視作賽馬為一項娛樂活動又得，一門生意亦可以，總之，每人會抱住唔同態度，當然，最後冇人唔想贏到馬會錢，長期作戰而經常性撇帳，期期注碼幾少都好，總有冇癮嘅1日，事關唔係前世爭佢嘛，1季83期賽事，但硬係叻唔到1期，自卑感和自信心漸漸會失衡。

　　要贏馬會錢，法門多到講唔晒，唔係誇張或唔自量，10蚊雞一注XXX，可以中幾千萬，一注單式電腦3T，一樣可扑中。咁多年嚟，報紙都唔知賣過呢類消息幾多次，阿婆阿伯經常因此上新聞版。然而，亦有年邁親戚講過：「唉，XXX！由成頭黑髮買到白晒兼甩埋，依然冇份中！」但鬧還鬧，此類人士，終其一生，追隨XXX，永冇變心（洪某都買咗超過廿年啦）。

　　像上述法門贏錢，要有大運、幾生修到、福澤綿綿、祖先保佑等等。其他正規啲嘅方法，就好似有坊間嘅集團式經營，整合運算後列出每期投X餐單，從合法渠道去投X，1季賺取十幾二十個巴仙回報率，惟呢種方法動輒大量資金，冇番咁上下身家，根本營運唔到。咁，我哋點樣可以喺呢場持久戰之中，保本之餘又有所增長？首要當然係克己，注碼控制係第1戒，場場賭，好易冇。就算唔計抽水因素，係咪都參與，雖可講成分散風險，同時亦損害利益，注碼唔夠集中啊。

馬會賽馬節目主持　洪禮賢