賠率有路捉：真心「粉絲」WP都愛

猪拉多纳

　　噚日晏晝好多飛落咗喺一檔馬度，先唔講怪飛馬，淨係熱門都有好幾隻嘅票數同近績不相符，例如第八場「雙龍出海」，雖然佢季初係勁，但近兩場都大敗，個W 竟然得8.6倍，仲熨過上場入位嘅「開心自在」同「進取」，除咗一檔之助，真係冇其他原因。如果飛數真係暗示檔位偏差大，大家要小心留意。

　　第四場五班1400米，「真心」來港兩季跑咗十四場，最叻係上仗個跑第七，仲要係喺快活谷攞嘅，所以賠率亦好公道，大多數係99倍，惟獨近期好似有班「粉絲」睇中咗佢，自從落五班，最後賠率一次比一次熱，大前仗65 倍開跑，難得輸咗逾十四個馬位，翌仗啲飛反而勁咗，有62 倍，當然又輸。但係「粉絲」們死心不息， 見佢轉跑谷草，仲買大啲，導致上次得番55 倍，雖然都係輸，但明顯進步咗，輸兩個幾馬位啫。可能因為呢個績加埋一檔，噚日個W已經唔講得笑，大部分時間得14倍，仲要連P 都係得3.1倍，跟番一注穩陣。

杜利萊熱馬多籮籮

　　騎師王冇咗韋達同白德民，果然風雲色變，賠率嘅斷層亦冇平日咁嚴重，不過杜利萊得4倍就令事情明朗得多。睇番佢手馬，七匹入面有三匹係大熱，當中包括上場贏馬嘅「自由萬歲」，唔通真係可以贏幾場？信佢。

周仲