洪禮賢講馬：辣得喜千兩寶寶飛天龍駒齊勝 萬事綵大旋風當旺日月暉華

魑魅魍魉

　　谷草B欄C彎嘅檔位及跑法，會唔會平衡？真係唔易，嚟到季尾更加難發生。1至6檔馬，點都秤高啲，跑法積極嗰批，梗係要重視。

重心場次　第6場　第四班（60-40分）1650米

　　「劍鋒」上賽後驗到腳傷，隔日可復課，影響唔大，臨尾仲有彈泥閘，放心晒。以佢跑法及1檔，如果今場唔係亂跑、慢閘或被敵意騷擾，唔難放入位置。

　　「追月」轉倉後做幾多嘢，惟大閘走得唔算好養眼，跑個底喺四班則夠有凸。「天下寶」連大盲門田草也入Q，此程冇理由會退步。

　　「彩虹幻影」好早期已指出射程在1650及1800米，以4仗前三班同程輸近賽績計，喺度有得爭。「財富之星」具備良好態況，10檔卻際遇難料。「橫亨」首次入P後，對佢已愈來愈冇信心，睇吓4檔幫幾多。

第1場　第五班（40-10分）1200米

　　「小鬥士」4仗前贏得「團隊福星」和「友情友義」，頭馬水平唔只值五班（後兩駒在班內已贏）。上賽早段慢閘放唔出，後追一樣有P，表現出色，落班即回到此程，用埋柏寶，似樣。「好願景」前仗已貼，斷唔會五班冇得贏，而上場轉馬房兼轉配件後，陣上規矩晒，的確有起色，再追。

　　「好玩神駒」耐冇跑，而處理手法又唔完善，剛賽拉士仍喺外叠追過吓，難得復課後可大手做工夫，或有進一步演出。「喜鵲」和「齊齊掂」邊線腳。

第2場　第四班（60-40分）1000米

　　「辣得喜」1檔預咗賺晒，加埋主動跑法，效果事半功倍。「千兩寶寶」唔係一般四班頭馬（曾經保持季內1200米最快時間），係蝦佢11檔及休出，但睇大閘卻不差。

　　「飛天龍駒」跑到第3仗唔同晒，但如果唔係早段太落後，並在出彎前後未夠努力，唔應該只得第五名，今仗換人或可睇多啲實力。「齊勝」和「上浦駿將」，一對後上馬，路程性能以前駒好。

第3場　第三班（80-60分）2200米

　　「旺國手」前仗入P，輸畀多捷「包裝選擇」及皇太后盃盟主「威利旺旺」，在此贏晒級數。「赤胆雄威」對上3場毫無表現，惟3仗前同程曾衝贏「可愛人生」，隻馬一旦有番mood，爆得！而賠率有十幾倍，可博。

　　蔡廐「風力威猛」與「印度光輝」，前駒有路程經驗，後駒轉場賺卡士，可兼顧。「馬主光輝」大閘唔係試得唔好，只怕兩個多月來首次跑大長途，會交出幾多成功力。

第4場　第四班（65-40分）1650米

　　「新力多」上場已納入貼士範圍，輸最後一步，關唔關跌鞭事都好，證明三班係夠贏。呢場多馬走，佢唔使焗放，其實仲好。「旺家多寶」及「大將風範」，前駒跑低半班，有埋好位輔助，如交到與「漸信良駒」串Q水準，冇對手；後駒跑法機動，係9檔略擔心，希望早段扯得快，佢易楔到入嚟。

　　「歐洲駿馬」上月工夫曾放緩，惟近試觀感收貨有餘。「共同目標」成日慢閘，上場如是，不過，以初跑谷草，加埋唔細緻去處理，一樣衝得勁，細場性能幾好。

第5場　第4班（60-40分）1200米

　　「萬事綵」一再證明自己喺三班冇運行，四班就唔同講法，畀埋1檔佢，隨時全程順風順水。「日月暉華」和「大旋風」，剛賽俱追得靚，若結合今仗檔位，後駒或可反先。

　　「祥禎」上場1000米排12檔，我仲會博佢有P，但B欄1200米12檔真係「窄」。「當旺」跑銳勢及形勢啫，分已盡。

第7場　第三班（80-60分）1650米

　　「魔幻大師」跑谷草「恰」對手，預計有埋主動跑法，在今場唔快嘅場合應揩到油水。「華倫天奴」啱啱喺此程入P，早段自己唔放係笨笨哋，呢場9檔但冇馬走，可能驅使佢行先，未必唔係好事。

　　「勝任有餘」評分減多咗，加上回一回，儲夠體力，嚟到季尾或可翻身。「揀得正」如遇到利追場合，開正佢嗰瓣。

第8場　第三班（80-60分）1200米

　　「橫掃千軍」賽前準備程序與近仗唔同，有心唞夠跑今場，而喺最近大閘，前中段試嚟幾有速度感。揀得最有根據嘅此程，實搏。「歐洲動力」前仗唔係直路要轉位必有Q，隔了1場田草，呢組對手明顯不如前，成績可能又好番。

　　「佳同」與「精靈勇駿」，近績靚，一追一放，同樣有威脅。「海之宏」經上場後已失信心。「新力飛」10檔累事，本已不太超班，過熱只宜拖腳。

馬會賽馬節目主持　洪禮賢