雷勁論戰：軒轅勇將重返勝途

港陌

　　頭場四班1000米賽事，苗廐有搏殺消息傳出，指「健康精英」有力先拔頭籌。此駒早前兩試800米閘，均能一放到底，足見速度甚高。原本韋達一早已向廐主索騎此駒，可惜現時正值停賽期，故未能操刀，改由卓利執韁。

　　不過，卓利今季與苗禮德合作愉快，已先後替苗廐勝出11場頭馬，當中有五W更是在直路賽取得，今次「健康精英」配他出爭直路賽，亦是理想人選。排三檔起步，以其速度應可一早搶出佔據有利位置，有權一放到底，可作今場馬膽。

父子兵唞夠出擊

　　同場對手方面，最大勁敵應是賀賢馬房的「父子兵」，此駒亦是1000米直路賽好手，今次唞夠才上陣，交由柏寶操刀，亦有爭雄之力。「黃金年代」近期備戰亦積極，潘頓揀騎此駒上陣，機會應不弱，可作配腳。此外，沈廐「好歌」亦是必拼之馬，此駒曾有腳患，所以專攻直路賽，因不用轉彎可減少傷腳的機會，用杜利萊操刀亦有機會爭入一席。

　　另外，出爭第五場四班1200米的葉廐馬「軒轅勇將」亦要留意，上季曾在新馬賽1200米擊敗「陽明飛飛」、「讚惑」等對手贏馬，賽事水準甚高，反映質素不簡單，只是其後進度徘徊才未能再奏捷。

　　不過，上仗「軒轅勇將」出爭1400米已交出接近走勢，可見狀態復勇，今次回師贏馬途程1200米，用何澤堯減磅上陣，應有好大幫助。馬有高速，路程正宗，可憑輕磅之利放到，值得睇好。

　　配腳方面，「快樂無窮」新勝猶勇，可加入作配。「雙辣」亦是此程之材，近況當勇，強配白德民戰意明朗，有力爭入三甲。此外「良辰美景」有進步，亦可作配。