曼城夠狠保頓唔夠砌

猪拉多纳

22/05/2011
文： 蘇斯黑柴

英超煞科同大家傾吓保頓主場對曼城（有線303及203台周日晚11時直播），保頓今季主場暫排英超第六，至今十勝五和僅三負；再睇曼城，踏入今年後十二場作客只得一勝，近五場作客仲輸咗四場。呢場客Ｗ熱到1.55倍，睇落咪好牙煙？


炒史篤城套form靚


雖然係咁，黑柴企硬捧曼城，仲要捧埋「讓球客勝」同泰維斯嘅首名入球添！曼城近期喺各項賽事三連勝零失球，攞咗歐聯入場券又捧埋足總盃，今仗只要贏波就可以確保季軍免踢歐聯外圍賽，當然搏埋佢。大家只要有睇佢哋上輪聯賽點樣炒史篤城，都會同意佢哋連一向都唔係咁順嗰套form都出埋嚟，而且成班人落腳吓吓唔收嗰種兇狠法，話咗畀大家知佢哋對勝利有幾飢渴，憑質高、齊腳、托弗兼肯砌，足以克服作客不濟嘅毛病。


泰維斯專破保頓


講戰意，曼城最強嘅當然係隊長泰維斯，呢位射手同貝碧托夫爭緊金靴，呢個時候面對佢嘅私房菜保頓真係嗒晒糖，佢嚟咗英超短短五季，已經六度攻破保頓大門，如果由○九年夏天加盟曼城起計，三次對保頓全部有波入，共入四球，近兩次仲全勝兼全部取得首名入球添！




再睇保頓已經冇嘢爭，季尾演出走晒樣，近期四連敗兼連失十球，主場對新特蘭都要擺烏龍衰收尾，可見成班球員已經有收咧心態，多名主力都執定包袱等走人，陣中仲傷兵滿營，今晚就算有心主場謝幕都唔夠砌啦！