洛達海牙夾份做細界

猪拉多纳

22/05/2011
文： 笛子波童

荷甲附加賽今晚上演四場次回合賽事，四日前嘅首回合賽事一共炮製二十個入球，以大細中位數2.5計更加四場全大，可想而知戰情相當開放。不過來到次回合卻未必再有呢支歌仔唱，其中歐霸盃資格賽洛達主場對海牙最有機會開細盤。 （周日晚6時30分開賽）




海牙首回合主場以四比二大勝洛達，可惜首席射手布利堅領紅牌被逐，今仗需要停賽，料對球隊造成一定影響，好彩佢哋目前有兩球優勢，今場只要唔輸都可以晉級，因此預計佢哋會踢得較保守，以保住勝果為首要目標。記得今季聯賽次循環碰頭，海牙作客曾以一比一打和洛達，總計海牙近六次作客洛達亦有五次開細，捧細盤絕對有根有據。洛達首回合落敗好大原因和射手真卡停賽有關，雖然佢今場可以復出，但既然海牙有備而來，主隊想收復失地亦唔容易，一於反其道捧細盤。


荷華高斯添食「格」


另一場歐霸盃資格賽格羅寧根主場對荷華高斯，荷華高斯季尾愈戰愈勇，連同首回合賽事擊敗格軍，佢哋已經連贏四場，狀態弗到漏。自從格羅寧根今季放走前任教頭朗贊斯，表現明顯不及以往穩定，而且佢哋今季三次對荷華高斯全敗，心理上未踢先輸，捧「讓球客勝」。