拉素鬥志勁抵撐！

猪拉多纳

22/05/2011
文： Katie

放低咗個木結他足足10年，Katie最近忽然興起又再彈番，仲特登去琴行買咗「賣飛佛」Jason Mraz嘅譜返屋企，準備自彈自唱娛樂吓屋企人，估唔到昔日彈得一手好結他嘅我，家陣只係記得個C Chord點(扌禁)，睇嚟都要摷番啲書出嚟惡補吓至得。><




有彈開木結他嘅朋友，都知就算彈魚絲線都會起晒枕，不過Katie今次抱住好大決心要操番熟手結他，夢想就係搵多個拍檔成立一隊組合，組合名都改好埋，叫「堂叔姪」。為咗完成夢想，纖纖玉手唔再靚又有乜所謂吖！


萊切主帥教埋今仗劈炮


做人冇夢想嘅話同條死魚冇分別，好似意甲首都球會拉素咁，家陣落後第4位嘅烏甸尼斯兩分，烏甸今晚對住已經封王嘅AC米蘭攞1分就完成任務，拉素想後來居上爭取來屆歐聯入場券嘅希望係渺茫啲，不過全隊上下包括會長洛迪圖在內都仲未放棄，淨係呢份鬥志都值得支持啦！




喺一眾拉素戰將當中，Katie就最欣賞靴蘭尼斯。呢位巴西中場能傳擅射，今季已經貢獻11個入球同5次助攻，對住上咗岸嘅萊切，拉素無論戰意同戰鬥力都贏幾條街。Katie知道萊切教練迪簡尼奧教埋今仗就劈炮唔撈，不過佢隊波今季失咗62球，今仗仲要有守將托莫域坐波監添，睇怕迪簡尼奧都要輸鑊勁嘅離場喇，一於捧2.65倍「讓球客勝」啦！（now632台及廣東體育周一凌晨2:45直播）


睇波行街Guide


雖然Katie唔係曼聯躉，不過都有啲好嘢介紹番畀大家。紅魔鬼為慶祝破紀錄奪得19次聯賽冠軍，最近就推出咗一系列冠軍Tee同波衫，有興趣嘅上曼聯官網目及目及啦！


微博傳情@Katie


各位我又轉咗Look啦，一頭黑色長髮係咪好清純呢？媽咪都話我個樣乖咗，呵呵！

發 布

嚟緊星期六、日係大日子，因為日本搖滾勁旅L'Arc~en~ciel將會喺東京味之素體育館開Concert，慶祝樂隊成立20周年。聽講L'Arc會將部分收益捐去賑災，香港仲會有戲院同步直播添，有冇人陪我去睇呀？