波圖向4冠王衝刺

猪拉多纳

22/05/2011
文： 朱楓

啱啱捧走歐霸盃嘅波圖，今晚又會喺里斯本奧埃拉什國家體育場同甘馬雷斯爭奪葡萄牙盃。波圖教練保亞斯只要再捧盃，就會超越莫連奴成為「4冠王」，試問又點會甩拖？對住慣做二奶嘅甘馬雷斯，朱楓捧梗1.78倍「讓球客勝」！（有線155周一凌晨0:00直播）




波圖今季真係弗到爆炸，繼捧走葡超盃同葡超冠軍後，啱啱仲喺「葡超內訌」贏埋布拉加成為歐霸盃盟主，今晚只要再贏葡萄牙盃，教練保亞斯就會幫波圖成為4冠王，超越莫連奴喺02年執教波圖首季取得三冠王嘅成就，到時就唔使再活喺對方陰影之下啦！


保亞斯望超越莫連奴


其實波圖近年都幾鍾意捧葡盃，已連續兩年捧走呢項賽事冠軍，今屆喺晉級過程入面仲勁有說服力，4強首回合主場落後賓菲加0:2，次回合作客竟大勝對方3:1憑作客入球優惠晉級。陣容方面，波圖今場可繼續以上周中對布拉加嘅人腳出擊，當中一對射手法卡奧同侯克今季喺葡超同歐霸盃都入波入唔停，今仗面對次一級嘅甘馬雷斯，質素完全超班，隨時大開殺戒都唔定。




甘馬雷斯今季打出可能係球會史上最佳一季，除喺葡超攞第5，更打入葡盃決賽，不過朱楓覺得甘馬雷斯打入決賽全靠賽程有利，喺晉級過程中對過最勁嗰支球隊竟然只係葡超弱旅科英布拉大學。事實上，甘馬雷斯一向同葡盃無緣，之前4次入決賽都香晒，包括23年前不敵波圖，加上近17次對波圖只得2和15負劣績，有12次更輸2球或以上，睇怕呢鋪都係見證波圖創造歷史。