球迷唔撐愛爾蘭「內訌」輸聲細

魑魅魍魉

24/05/2011


今年首次舉辦嘅「國家盃」認真亂晒龍，英超煞科只係2日，今晚就安排愛爾蘭主場對北愛爾蘭嘅愛爾蘭「內訌」，搞到雙方好多主力都踢唔到，北愛球迷更玩杯葛唔去睇波，試問球員冇球迷支持仲邊有心機踢呀？玩1.62倍入球細啦！（開賽時間：周三凌晨2:45）


英超剛煞科冇晒主力


為藉比賽提升實力，愛爾蘭、蘇格蘭、北愛爾蘭同威爾斯今年搞咗個單循環嘅國家盃，但作為主辦國嘅愛爾蘭喺賽程編排就認真唔掂，先係無端端喺2月初踢咗第一場愛爾蘭對威爾斯，到依家英超煞科只係2日，又要愛爾蘭今晚喺主場對北愛爾蘭。由於太趕，維拉後防施亞蘭奇勒同些路迪前鋒史杜基斯都先後退出，曼聯中場吉遜、後防奧沙、莫斯科斯巴達翼鋒艾登麥基迪及雷丁射手沙恩朗亦趕唔切歸隊，想重現首仗大勝威爾斯3:0嘅戰果唔易。




北愛爾蘭亦一樣，由於英超啱啱煞科，所以富咸後防艾朗曉士、西布朗中場布拉特都未有被徵召，國家隊史上首席射手大衞希利亦因狀態差落選，但最大問題係北愛球迷會因不滿當局喺賣票方面諸多限制，正準備控告愛爾蘭足總剝削人權，今晚更率先搞杯葛叫球迷唔好入場睇波，據講本來會入場嘅7,000名北愛球迷，可能得番700人入場，預期球場將出現好多吉位，你話雙方球員仲邊有心機爭士哥呀？