沙士菲平手盤好路

猪拉多纳

26/05/2011
文： Mic少

南美自由盃四強首回合，彭拿路主場對沙士菲，阿根廷勁旅沙士菲今季雙線爭標，聯賽獨佔鰲頭之餘，進入自由盃淘汰賽階段後四戰全勝，展現冠軍相，而且呢項大賽一向係巴西及阿根廷球隊天下，烏拉圭兵團彭拿路即使打入四強，都只係陪襯居多，平手盤捧沙士菲。（有線61台周五早上8時50分直播）


雖然話巴西及阿根廷球隊喺今屆自由盃成績比以往遜色，八強兩國各只有一隊，分別係山度士及沙士菲，但佢哋最後亦能進身四強，證明真金不怕洪爐火。特別係沙士菲晉級過程充滿說服力，十六強兩回合共贈利加大學五蛋，八強兩回合贏利伯泰迪七比二，有遇神殺神，遇佛殺佛之勢。

彭拿路近況曳

過去十屆自由盃有七屆冠軍落入巴西或阿根廷球隊之手，對上一次有烏拉圭球隊打入決賽，已經係一九八八年嘅事，彭拿路想為國爭光，恐怕唔容易。


除咗因為烏拉圭足球聯賽水平較低之外，彭拿路近況亦唔掂，近五場比賽只得一勝一和三負，佢哋最近一次同阿根廷球隊交手，係今屆自由盃分組賽，結果主場以○比一輸畀獨立隊，今仗面對實力更強嘅沙士菲，前景凶多吉少。