紅魔強細復仇

港陌

28/05/2011
文： 樂比堅尼

萬眾期待嘅歐聯決賽將於周日凌晨在英格蘭溫布萊球場上演，今仗係○九年決賽翻版，兩年前曼聯輸得難睇，相信好多球迷仍歷歷在目，但紅魔鬼吸收過上次教訓，加上有半個主場之利，受讓可捧1.85倍「讓球客勝」。決賽場合兩隊踢法唔會太進取，不妨捧埋1.62倍細盤。（有線61及201台周日凌晨2時45分直播）


今屆歐聯未輸過


如果以波論波，巴塞同曼聯確實並非處於同一層次，因為巴塞今季打破咗多項紀錄後，好多人已討論緊，呢支「地上最強」球隊究竟係咪史上最強，樂比仔未夠資格答呢個問題，但如果假定巴塞並非無敵嘅話，除咗莫連奴領軍嘅皇家馬德里，又或者全盛時期嘅車路士，曼聯確實係呢個世界上最有條件擊敗巴塞嘅球隊！




曼聯今場最大優勢就係喺英格蘭出戰決賽，雖然地點係倫敦溫布萊球場，但對曼聯球員嚟講，除咗奧脫福之外，最熟悉嘅都可以話係呢個球場，尤其係溫布萊球場嘅草地近年被多次批評，曼聯相信喺適應呢方面較巴塞佔優。另外巴塞因冰島火山爆發而提早到倫敦備戰，離鄉別井多日，亦可能影響到巴塞一眾球員作戰情緒。


巴塞作客打折扣


如果從菠菜角度睇，捧曼聯最大優點就係有得受讓，畢竟曼聯今季十二場歐聯都未輸過，而且近四屆歐聯曾三度打入決賽，平均成績仲好過巴塞。吸收過兩年前決賽輸波教訓，相信費格遜會有所得着，預計會踢得更保守，就算贏唔到巴塞，守和對手博加時或射埋十二碼絕對唔奇！




巴塞雖然係超班，但亦非天下無敵，佢哋喺西班牙盃決賽曾不敵皇馬，另外歐聯作客亦輸過畀另一英超球會阿仙奴，季尾入球能力亦明顯不及季中。其實巴塞喺主場同作客表現分野頗大，反觀曼聯踢大戰作客反而更起勁，今屆歐聯六仗取得五勝一和，今仗絕對有力同巴塞一鬥。