賠率有路捉：八逢九紫P熨手

猪拉多纳

　　唔知同剛剛谷草賽事利放頭馬有冇關係，噚日睇飛，淨係得第二同第六場曾由後上馬做大熱門，撇開頭場新馬「名馬」唔計，其餘八場賽事嘅熱馬都係擺前走嘅。究竟係谷中大戰後遺症？定真係早走早着？睇過先知。

　　除咗熱門，其實冷馬亦受上述趨勢影響，P被熱捧，五場「得力助手」同七場「八逢九紫」就係最明顯嗰兩隻，當中後駒個W同P更曾出現唔成正比嘅情況（W有12倍，P得1.3倍）。

　　「八逢九紫」近三仗次次得第八，故此上仗嘅最後賠率唔多支持，賣到22倍，結果真係唔得。但係今次，佢個P落得咁放心，究竟點解？我諗唔多唔少同馬房有新部署有關，胡森今次決定唔用大師傅鞭策隻馬，改用蘇狄雄減吓磅。個書包只係119磅，唔放頭咪好蝕底，既然有飛，可以信埋呢次。馬偉昌大賽日有「粉絲」

　　騎師王方面，韋達果然熱到得2.25倍，而拍住佢嘅係蔡明紹，有3.3倍。兩者雖熱，但係不得不提醒大家，大賽日例醒嘅馬偉昌今次有飛，得7.5倍，唔可以忘記佢。

周仲