彼德堡哈你冇人幫

猪拉多纳

29/05/2011
文： 麥馬拿仁

「紅魔太子」戴倫費格遜身上流住曼聯血，今晚英甲升班附加賽決賽，帶領彼德堡於奧脫福出戰哈特斯菲爾德，可以贏波達標！戴倫雖然話曼聯領隊老竇費格遜今仗唔會親身入場打氣，但一場關乎囝囝事業前途嘅大戰，又咁啱喺自己地頭舉行，做老竇嘅又點會唔喺幕後「做番啲嘢」，為戴倫鋪平升班坦途先？彼德堡今仗有半個主場之利，加上呢隊波攻力唔錯，平手盤一定着數晒。（now 638周日晚10時直播）


做囝囝軍師教晒路


英甲季軍哈特斯菲爾德同第4名嘅彼德堡，分別於升班附加賽4強淘汰般尼茅夫同米爾頓凱恩斯，齊齊殺入決賽，咁啱今場波安排於曼聯主場奧脫福舉行，無形中對彼德堡極為有利，因為佢哋領隊戴倫，就係紅魔鬼主帥費格遜親生仔。戴倫於球員時代効力過曼聯，於07年開始教波，首支執教球隊就係彼德堡。正所謂「虎父無犬子」，戴倫帶領彼軍連續兩季升班，於前年就打上英冠，可惜之後佢跳槽教普雷斯頓並不成功，今季半途重返彼德堡，即打入升班附加賽決賽，睇到戴倫同彼德堡好有緣分。




今次決賽於奧脫福舉行，對彼德堡當然着數，因為戴倫熟晒奧脫福，而老費一直錫到個仔燶，肯定將畢生功力過晒畀戴倫，連哈特斯菲爾德主帥李爾奇勒，都話羨慕戴倫有個咁勁嘅軍師。戴倫於賽前話，佢老竇係個迷信嘅人，故今場決賽唔會入場睇，不過話老費事前冇教路，就一定冇人信。


哈特斯菲爾德「半作客」


費格遜係當今球壇其中一個最出色嘅領隊，面對過無數決賽場合，戴倫收到老竇超勁心法，加上費Sir有能力喺奧脫福製造對彼德堡有利嘅因素，故彼德堡可謂未開波已經贏咗地利同心理。事實上，即使以波論波，彼軍攻力亦係冠絕英甲，本季46場聯賽攻入106球，射手馬卡爾史密夫同佐治保特都弗，反觀哈特斯菲爾德樣樣數據都好一般，「半作客」情況下，平手盤揀彼德堡。