洛辛堡主帥保飯碗搏殺格

猪拉多纳

30/05/2011
文： 牛奶仔

挪超今晚上演獨腳戲，錄得近50年最差開季成績嘅衞冕冠軍洛辛堡（下圖右），為咗保住新帥飯碗，周二凌晨作客奧特格寧蘭定必拚盡搶分，平手盤撐2倍洛辛堡。（開賽時間：周二凌晨1:00）




洛辛堡今季改由新教頭真莊臣接手後，表現大跌Watt，經過8輪聯賽後僅得2勝2和4負，只係領先包尾嘅維京2分，你話新帥真莊臣又點會冇壓力？好彩班球員經過季初適應期後已逐漸重返正軌，近4場攞到2勝1和1負成績，仲要有兩名中後防球員丹尼爾賀姆及凱蘭特及時復出，令兵源調動更為充裕。


奧特格寧蘭對賽輸蝕


反觀奧特格寧蘭上場領先兩粒嘅大好形勢下，臨尾12分鐘竟連失3球，最終輸畀史達比克士氣大挫，後衞費特歷貝治及前鋒波雲兩名新星又齊齊養傷，實力進一步受損。再睇埋往績，奧特格寧蘭近5次對賽都贏唔到，睇嚟呢3分都係凍過水！