棟悉先機：紅日後勁冇得頂

港陌

　　炎炎夏日，唔係想揀熱門「火上加油」，由於谷草跑法偏差，個個馬迷心中有數，如果排內檔之實力馬，賠率通常都低水，抵唔抵博，各有各心態。而阿棟經常強調，咁窄嘅賽道，買馬嘅場合，一場起兩場止，唔會玩多過三場，所以，今期推介之心水，實際上係一對大摩之馬。

　　第五場三班1650米。「紅日」今季成績冇想像中咁好，跑得兩個P，睇過往績，原來匹馬年多未贏過，上季亦僅獲3場位置。實力係咪退化之中，我又唔係咁睇，因在首季三捷後，評分需時消化，而此馬後上跑法，亦容易受掣肘，才令成績沒法突破。今仗續跑此程，如遇到快步速，交得出剛賽與「揀得正」構成連贏的後勁，同場「魔幻大師」也不易抵禦。

　　第六場三班1200米。「紅旗勇將」係阿棟心頭好，冇法子忍得住對牠的熱情，出親都會捧。其實，除了初出變化地表現平平，之後兩場冇W有P，成績有目共睹，經已表現出牠的光彩。今仗重返谷草1200米，如果看過上場田草1200米的追勢，目前3歲仲係嫩，細場較易搵到食，只要重磅唔係變成太大負累，要贏番場，唔認為有咩馬可挑戰。

　　第八場三班1650米。「伽羅」前景如何？大家心中有尺，我就保守少少，預期二班會有頭馬。至於今次加程至一哩，根本係必要，你睇佢上場跑短途，早段留得辛苦，直路騎者又「撩吓撩吓」，人馬發揮俱不完善，一樣有P，證明轉馬房後適應快。大摩肯在路程方面作配合，都係想交代吧！

點買法

　　我都知呢對摩廐馬係熱門，但「紅旗勇將」及「伽羅」如有十倍反而要驚啦！兩駒勝在鬥志冇疑問，買W一於博呢對。重心Q方面，尾場可能有啲肉食，因為部分邊線馬比預期高水，可拖多一兩匹。

資深評馬人　陳華棟