贏錢心德：災後始動日本唔赦秘魯

港陌

01/06/2011
文： 走肖

東日本大地震後，日本國家隊喺麒麟盃首戰「始動」出擊，當然唔衰得，教頭沙哲朗尼更講明會排「343」新陣，今晚日本喺新潟主場對秘魯，對手20人大軍得5個外流球員，遊埠格阻唔到日本開2.2倍「讓球主勝」。（開賽時間：周三晚6:20）




雖然唔明歷代以出擊邊衞做賣點嘅日本，點樣可以將442陣式改成343，到底左閘長友佑都同右閘內田篤人要點踢？但我唔明唔代表沙哲朗尼做唔到，佢喺奪得今屆亞洲盃前，其實已決定用343，只不過當時受傷兵問題影響至放棄，最後改以433攞冠軍至證明佢有料到。


秘魯得5名外流兵壓陣


雖然前鋒本田圭佑、中堅吉田麻也同後衞長友佑都尋日先歸隊，不過唔計地震義賽，今場係地震後首次出戰，除咗王牌香川真司傷愈缺態免役，大部分外流球員都有歸隊，賽前更加會出售印上「we are all together」字句特別版波衫籌款，點會揸流攤。




對家秘魯嘅雲達不來梅射手比沙路同費倫天拿中場祖安華加斯冇被徵召，漢堡前鋒荷西古里路同布拉加後衞阿拔圖洛迪古斯因傷退隊，5個外流球員裏面，得番史浩克04前鋒法芬同埋艾美利亞後衞艾卡錫迪叫做似啲樣，根本唔似有心搏命，日本要攞威抵捧得多。