敲德國3.55倍讓球和

魑魅魍魉

03/06/2011
文： 力奇

老牌勁旅德國喺歐國盃外圍賽A組5戰全勝遙遙領先，佢哋今晚出訪實力平平嘅奧地利，雖然話唔難贏波，但考慮到佢哋傷兵滿營，難免有所顧忌，恐怕難以大勝，冷敲3.55倍「讓球和」。（廣東體育周六凌晨2:30直播）


奧地利靠川迪前鋒孭飛


德國至今5戰5勝，仲要係入17球僅失1球，喺呢組的確超晒班。問題係佢哋受到嚴重傷兵問題困擾，主力如前鋒高路斯、中場舒韋恩史迪加、德拉舒都先後因傷退隊，梅迪薩卡同波歷克等根本冇喺名單出現。如果唔計3個門將，佢哋目前就只剩低16個球員候命，你話領隊勒夫點敢去得太盡先？唯一好消息係中場基迪拉趕及傷愈，加強咗中場防守力，奧地利睇怕更加難偷雞。




主隊呢邊，現以5戰得7分排小組第4，要爭小組次名唔係完全冇機會。不過，領隊哥斯坦天尼話明班波要團體唔要天才，結果至今喺外圍賽入最多波嘅不來梅前鋒阿拿奧杜域落選，連中場指揮官艾雲舒捷斯今次都冇份，要搵4個新丁入伍。前線僅靠川迪前鋒真高孭飛，希望憑主場之利，輸少當贏啦！