意大利唔係玩泥沙

魑魅魍魉

03/06/2011
文： 亨格比利

仲記得柏蘭迪利上年接掌意大利之後，首場正式比賽就係對住愛沙尼亞，當日意大利驚險反勝2:1，今晚雙方再喺歐國外C組碰頭，亨格比利相信戰況將會係一面倒，事關柏蘭迪利講明邊個揸流攤就唔使旨意出戰決賽周，加上愛沙尼亞大軍天殘地缺，意大利有力大勝，要1.4倍「讓主」。（開賽時間：周六凌晨2:45）




今場波喺摩德納舉行，雖然意甲收咧接近兩個禮拜，但據右閘馬治奧所講，大軍一啲放假Mood都冇，最近喺托斯卡尼集訓個個都搶韁，鬥志可謂一流。領隊柏蘭迪利今次冇揀羅馬中場迪羅斯，講到明唔係球星就入硬國家隊，冇狀態嘅話就咪使旨意出席決賽周，班國腳聽到呢番說話仲唔加多兩錢肉緊咩！




賽前巴洛迪利練波整傷右膝，肯定缺席今仗同下周三對愛爾蘭場熱身賽，不過咪話亨格比利黑心，呢位「壞孩子」踢波唔用腦、紀律又差，冇咗佢反而係好事，況且基奧斯比羅斯、卡斯辛奴、柏仙尼同馬特尼今季都相當弗，前線大把人用根本唔使愁，加上傷愈嘅派路亦會正選落場，意大利嘅火力依然有保證。


愛沙尼亞天殘地缺


睇番C組形勢，4勝1和嘅意大利揸住13分排榜首，仲要比2、3位嘅塞爾維亞同斯洛文尼亞踢少場，出線機會高唱入雲。反觀排第4嘅愛沙尼亞雖然仲有機會出線，但中場主力迪米列積夫、後衞薛度蘭高夫同前鋒奧柏都受傷落選，首席射手華斯積夫仲要坐波監，領隊魯迪利焗住要用坦尼斯迪同莫斯尼高夫擔大旗，本身實力已經曳，依家個陣仲咁殘，想唔輸鑊勁都難咯！


藍衫軍對賽贏條街


‧C組失波最少隊伍，5戰失1球。




‧歷來5鬥愛沙尼亞獲全勝。

愛沙尼亞場場失波

‧歐國外小組5戰場場有失波。

‧最近8場國際賽未試過半場領先。