喀麥隆內訌食塞都骾親

港陌

04/06/2011
文： 安高

非國盃外圍賽E組今晚上演一場超級生死戰，由「非洲雄獅」喀麥隆主場迎戰塞內加爾。雖然話喀麥隆今仗贏唔到就幾乎出局，但賽前卻傳出內訌，仲點讓得起波？安高會捧2.15倍「讓球客勝」。（開賽時間：周六晚10:30）


塞內加爾3箭頭火力勁


E組打完3輪，塞內加爾3戰全勝形勢大好，喀麥隆則得4分排第3，想話爭逐最佳次名出線都唔容易。佢哋今仗輸波的話，即時宣布出局，打和一樣形勢危殆，壓力沉重，賽前就連領隊基文迪都畀傳媒圍攻。更加大鑊嘅係，自世界盃以來首次獲得重召嘅阿仙奴防守中場桑治，突然宣布因傷退隊，同左閘伊高圖一樣唔踢得。不過事後有傳媒爆料，話桑治根本唔係膝傷，而係同隊長伊度奧嘈完，先至冇得玩，軍心受損仲點踢好波？




塞內加爾呢邊，主帥阿馬拉查奧爾本來想搵圖盧茲守將麥賓基爾同里昂後衞加斯沙馬入伍，但呢兩位前法國小將仲未搞掂轉籍，今仗唔踢得。前線雖然話丹巴巴亞因傷缺陣，不過佢哋3箭頭蘇維、柏比斯施斯同尼安，分別係法甲、德甲同土超嘅首、次、季席神射手，火力驚人。仲有一點，塞內加爾為咗爭取好成績，將會坐總統專機去喀麥隆出戰，球員抖得好，表現自然掂，受讓真係捧得過架！




賽制：44隊分成11組進行雙循環分組賽，每組首名、K組次名及另外兩支最佳次名球隊合共14隊，出線明年於加蓬及赤道畿內亞舉行之決賽周。