高清睇跑馬：驌龍可扶搖直上

猪拉多纳

　　「好利利」上季六戰得兩勝三位，今季四歲勇熟更進，以為係時候大展拳腳，點知頭三戰全輸，既然上季試過久休復出贏馬，結果今季再照辦煮碗，刻意休戰半載；果然上仗於總場次582田草1200米復出即贏，誇張的是排十四檔亦冇有怕，搶埋欄後愈放愈順輕勝兩個幾馬位，而跑出1分09秒27，僅比當日贏級際賽的「萬事佳」慢三線，另較尾場二班頭馬「步步快」快六線，同時亦係今季三班田草1200米的最快時間，可見實力高強。「好利利」重踏正軌後殺上二班仍無阻力，負輕磅有力再捷。

　　「驌龍」上仗於總場次579的田草1200米後備補出，閘前由十多倍打落六倍開跑，可見有人信心十足；排三檔起步後即居於前列內欄位置，但入直路時前面馬群未散開，「驌龍」因而未能望空；故此岳禮華只好將牠移出外檔，蝕位不少兼過了三百米才望空，起初衝刺未算勁，但拉士一百米撻着後卻勁如炮彈，最終更收韁贏馬。此駒跑出1分09秒54，乃今季田草四班1200米的第二快時間，最快則係「甜將」所造的1分09秒48，可見「驌龍」現評62分必有大把在手。

Sam