洪禮賢講馬：大旋風心中有勁氣定神閒超勝 金紫荊活力至寶日日中金獅名將

港陌

　　賽事到尾聲時分，谷草A欄亦唔一定有得追，實在由季中開始，已漸覺好位與前中置跑法之馬着數。

重心場次　第7場　第一班（90分及以上）1800米

　　「衝鋒槍」往績太好，少數會喺同程冇表現，加上大前仗贏同程造出季內最快時間，有晒亮點。賽前特別整夠兩大閘作預演，點會冇企圖。

　　「藍天」同程再遇前駒，受讓磅位更多（由8磅變16磅），就算反先唔到，點都拉近差距。大摩雙雄「卡達聖」和「包裝選擇」，前駒用脷帶，如能夠令前中段留得比前暢順，拉士鬥起上嚟會仲勁。後駒季內太準，而跑法或在今場有賺。

第1場　第五班（40-0分）1000米

　　「時時有機」賽前大手做嘢，得唔得唔知，動機則明顯。而上場焗住早段縮得後，末段仍有追勁。今仗檔好，如早段守得靚位，直路係佢世界。「先知先覺」係同場幾匹前領馬之中，近仗在前跟力方面最穩定，復跑此程，要揀。

　　「馬中神駒」贏完操練一度懶散，埋門則跳過3課，交到幾多成水準，要博！？「亞洲橙王」操練之辣，係近仗未見過。「甜酒」上場同程出彎前已三叠略蝕，最終有Q，要計高啲。

第2場　第四班（60-40分）1650米

　　「奄尖大少」前仗外叠望空，上賽打水戰，輸晒有藉口。總之今場隔夠日子，期間操得多，有目標。「得力助手」及「浪漫添馬」，評分未完全失利，發揮得好會有位置。

　　「財源來」一而再跑法被問，兼且目前喺40分，咩心態難估。「超勁精神」成日追一段，唔拖好似唔安樂。「錢程萬里」及「賞蝦王」有班，路程性能應以加罩的前駒較啱。

第3場　第三班（80-60分）1650米

　　「睡得好」前仗遇到慢放場合，上場田草喺直路曾打困籠，所以，先會一再做四哥。希望今仗好位及路合，成績可提升。「勝任有餘」上場解釋過有危險性，入Q已交到差，肯再揀此程，追多場。

　　「馬風雲」因應轉場及分數關係，已有得爭。「千江映月」要視乎步速，一慢佢就冇行；「快利多」情況一模一樣。「財運」之前初跑谷草，因途中動作唔順大敗（或因地慢），總之，今場如畀佢賺到慢步速，又會掂。

第4場　第四班（60-40分）1200米

　　「大旋風」差唔多喺上場跑啱晒，最後卻差啲冇P，成績係比預期曳，希望今仗對手略比上賽弱，可有贏面。「心中有勁」完全唔覺上場係因賺咗早段擺前優勢，耗力多仍保到Q，要跟進。

　　「氣定神閒」路短係不足，卻有機會早段唔使人馬係咁鬥力，如留得順效果未必唔好。「閃耀小子」和「神奇飛龍」，1隻曾傷，另1隻大閘稍嫌未夠主動，雖各有底質，限做腳。「質超駒」位好，可能名次會略進。「超勝」過去跑谷草如排大內檔，真係好少冇前幾名，大冷可敲。

第5場　第四班（60-40分）1650米

　　「旅遊小子」報埋周末田草，但目標應在今場，因季內3場四班谷草，冇甩過前四名，賽績夠照。「進攻足球」直路塞車，斷送上場贏馬機會，今場換人和轉場，安排應正面。

　　「喜運財星」轉此程比短途好跑，若加眼罩糾正內閃問題，可突破。「精算拍檔」田泥一哩二叠放仍可帶到，今仗7檔如夠決心切入仍有機會。餘駒以「安瑪」及「財富之星」可選擇。

第6場　第三班（85-60分）1000米

　　「金紫荊」及「大把在手」，一對徐廐馬，計能力及跑法，會以前駒較可信。「活力至寶」回到三班，賽事形勢完全唔同。「日日中」剛賽冇欄擺前走，衝線時仍幾貫注，今仗如內側「自由勝」唔夠佢快，貼到欄帶，有權放到。

　　「金獅名將」係傷病紀錄窒住，如果唔係，級數喺三班一定發到圍。「軍刀」10檔，冇晒上場形勢。「飛快威」等落班及加程。

第8場　第三班（80-60分）1800米

　　「國中之星」喺田草1800米，末段維持到勢頭，上場第五名要尊重。「印度光輝」和「馬主光輝」，早前齊齊跑得好，印象則以後駒較好，始終耐冇出，可即在長途有表現唔易。

　　「駕世仔」和「勝利福星」，前駒主動兼輕磅，加上跑短400米，氣量冇咁需求大。「非常好」如果重磅唔係太大負累，以之前泥地頭馬水準，喺度實夠。

馬會賽馬節目主持　洪禮賢