英格蘭 西班牙強戰星光大道

猪拉多纳

12/06/2011
文： Mic少

在丹麥舉行的U21歐國盃B組首輪上演決賽級戲碼，「小牛」西班牙U21對「幼獅」英格蘭U21，兩軍中前場人腳分量十足。西班牙擁有大國腳級保贊、桑馬達及迪亞高卡普，至於英格蘭「雙史」鋒線史杜列治及史葛冼佳亞射術精湛。雙方都具備強大進攻本錢，勢必好好利用發揮所長，屆時料會互相駁火，捧入球大。 （周一凌晨2時45分開賽）


兩隻「小牛」拎過世盃


西班牙足球字典之中，似乎只得一個「攻」字，球員自小被灌輸進攻足球概念，因此無論球會級嘅巴塞及皇馬，抑或國家隊大小國腳都採取主攻。今次西班牙U21亦有大量進攻人才，包括巴塞前鋒保贊、華倫西亞射手桑馬達、西維爾快翼迪亞高卡普，仲有畢爾包中場查維馬天尼斯，佢哋均曾經為大國腳披甲，桑馬達及查維馬天尼斯更係去年世界盃冠軍隊成員，中前場有咁多射得之人，想入少幾球都難。


「幼獅」雙箭極高效率


西班牙踢法具侵略性，而英格蘭則勝在進攻效率高，一對前鋒史杜列治及史葛冼佳亞都係把握力極高嘅射手，史杜列治去季季中被車仔外借去保頓後，盡展射手本色，上陣十二次射入八球，入球率非常高。効力史雲斯嘅史葛冼佳亞去季英冠有十九球進帳，並於升班附加賽決賽連中三元，協助球隊取得英超席位。以兩人嘅精湛射術，有力攻破西班牙大門。




今場係首輪賽事，雙方暫時唔需要理會積分出線形勢，可以放膽豁出去，贏到固然好，就算輸咗，之後仲有兩場可以追，大家較少顧忌之下，踢法應會比較進取。