巴拿馬當旺唔怕加拿大

港陌

14/06/2011
文： 笛子波童

C組另一場賽事加拿大鬥巴拿馬，巴拿馬分組賽兩戰全勝，提早出線唔係靠符碌，而且佢哋目前仲要搶分保住首名資格，今仗未必會放水。加拿大上場面對大部分時間十人應戰嘅瓜德羅普都只能小勝，欠缺強攻本錢，「讓球主客和」加拿大讓一球，捧巴拿馬「讓球客勝」。 （周三早上7時開賽、馬會網上文字直播）


加拿大欠主攻本錢


巴拿馬上場擊敗東道主美國，兩戰兩勝提早出線，佢哋今場只要攞一分就穩奪小組首名，C組首名八強對手只係其他兩組第三名，而且四強可以避開強敵墨西哥，所以相信巴拿馬唔會無故放軟手腳，令自己陷入不利之境。




加拿大上仗擊敗瓜德羅普打開勝利之門，不過贏波過程絕不輕鬆，對方守將林保迪於開賽僅四分鐘已領紅牌離場，加拿大卻要到下半場才靠一個十二碼險勝，兩場分組賽僅入一球，攻力難予人信心。




加拿大贏波便毋需理會其他戰果肯定出線，但面對小組兩戰全勝、踢法組織都比自己優勝嘅巴拿馬，單憑決心難言穩勝。巴拿馬上次對住美國強攻都未驚過，加拿大攻力比美國差一截，只要巴拿馬發揮之前兩仗水準，力足立於不敗之地。