洛辛堡重整旗鼓搵「里」笨

猪拉多纳

16/06/2011
文： 朱楓

今晚挪超加開快車，其中阿里辛特會喺主場挑戰洛辛堡。今晚呢場係洛辛堡休息半個月後再次比賽，可以話以逸待勞，更何況阿里辛特嗰邊仲要陣容不整，客勝有2.1倍真係值得捧場！（開賽時間：周五凌晨1:00）




上季以不敗姿態勇奪挪超冠軍嘅洛辛堡，今季因季前有多位主力離隊搞到成績大跌，開季至今喺聯賽只係贏過2場咁大把，暫時排尾三。不過呢支挪超勁旅，早排就因遷就挪超賽程，令新帥莊臣無端端獲半個月時間執過隊波，今晚表現應該會有改善，畢竟洛辛堡今季只係條防線曳，但火力依然強勁，當中前鋒派加暫時仲以7球排射手榜第2位，腳風順到冇人有。


阿里辛特射手要踢金盃


同洛辛堡相反，阿里辛特今季表現大勇，日前喺前列大戰作客擊敗史達比克，正式進佔位置三甲，但今晚要持續佳績唔易，事關中場迪馬菲臘斯同積臣摩利臣最近被牙買加徵召踢美洲金盃，當中迪馬菲臘斯暫時以3球成為阿里辛特首席射手，冇咗佢的確幾大鑊，再加上前鋒布斯特、中場費達列卡臣、史基利、富爾、柏保靴利拉全部仲養緊傷，陣容殘到咁，今晚真係隨時連蛋都破唔到。